सहकारी प्रकरणमा संसदीय छानबिन समिति बनाउन दलहरूबीच सहमति भएर कार्यदल गठन भएको एक साता बितिसक्दा पनि कार्यादेश टुंगिएको छैन।
गत शनिबार प्रमुख प्रतिपक्षी दल र सत्तारूढ दलहरूबीच संसदीय छानबिन समिति गठन गर्न सहमति भई समितिका लागि कार्यादेश तय गर्न कार्यदल गठन गरिएको थियो।
त्यसयता लगातार कार्यदलको बैठक बसेको छ तर समितिको कार्यदेशमा सहमति जुटेको छैन। बैठक आज पनि बस्दैछ।
नेकपा एमालेका प्रमुख सचेतकसमेत रहेका कार्यदलका सदस्य महेश बर्तौलाले आज दिउँसो ३ बजे फेरि बैठक बस्न लागेको जानकारी दिए।
कानुन मन्त्रालयमा बस्ने बैठक आज निष्कर्षमा पुग्नेगरी छलफल हुने उनले बताए।
‘आज जे विषय आएपनि निष्कर्ष आउँछ। शुक्रबारको बैठकसम्म सहमति नजिक सकारात्मक दिशामा गएको छ। आज कांग्रेस कसरी आउँछ भन्ने विषयमा भर पर्छ,’ बर्तौलाले सेतोपाटीसँग भने।
कांग्रेसले सुप्रिम, सूर्यदर्शनलगायत सहकारीको बचत अपचलनमा गृहमन्त्रीकै संलग्नता देखिएको भन्दै छानबिन समितिको कार्यादेशमा गृहमन्त्री रवि लामिछानेको नाम उल्लेख गरेर क्षेत्राधिकार तय गर्नुपर्ने अडान राखेको छ।
तर सत्तापक्षले भने संसदीय समिति बनाउनुपूर्व नै व्यक्तिलाई दोषी करार गर्न नहुने अडान राखेको छ। यही अडानका कारण शुक्रबार बिहानको कार्यदलको छलफल निष्कर्षमा पुग्न सकेको थिएन।
शुक्रबारको बैठकमा पनि सोही विषयमा छलफल भएको थियो। कार्यदलको बैठकपछि शुक्रबार नै शीर्ष नेताहरूबीच छलफल भएको थियो।
छलफल सकारात्मक भएको कांग्रेसले प्रतिक्रिया दिएको थियो।
कार्यदलमा सहमति नजुट्दा संसद बैठकपनि लगातार अवरूद्ध हुँदै आएको छ। प्रतिनिधि सभा बैठक भोलिका लागि बोलाइएको छ।
त्यसकारण आजै एउटा निष्कर्षमा पुगिने एमाले प्रमुख सचेतक महेश बर्तौलाले बताए।
कानुनमन्त्री पदम गिरीको संयोजकत्वको कार्यदलमा एमालेबाट बर्तौला, कांग्रेसबाट सहमहामन्त्री जीवन परियार र राष्ट्रिय स्वतन्त्र पार्टीबाट शिशिर खनाल सदस्य छन्।