सहकारी प्रकरण छानबिनका लागि गठन गरिने संसदीय समितिको कार्यादेश टुंगो लगाउन कार्यदलले शीर्ष नेताहरूलाई जिम्मा दिएका छन्।
शनिबार कार्यदलको बैठकपछि पत्रकारहरूसँग बोल्दै संयोजक रहेका कानुन मन्त्री पदम गिरीले सहमति भइनसकेको र बालुवाटारमा शीर्ष नेताहरूबीचको छलफलले टुंगोमा पुगिने बताएका हुन्।
यसअघिका बैठकहरू भन्दा धेरै नै अगाडि बढेर सहमतिको नजिक पुगेका छौं। हामी टुंगोमा पुगिसकेका छैनौं। बालुवाटारमा शीर्ष नेताहरूसँग बस्नेछौं। छलफलमा भएका कुराहरु शीर्ष दलका नेताहरुसँग राख्छौं,’ उनले भने।
सत्तारूढ दल र प्रमुख प्रतिपक्षी दलबीच सहकारी प्रकरणमा छानबिन गर्ने समितिले व्यक्ति तोक्ने कि नतोक्ने भन्ने विवाद छ।
प्रमुख प्रतिपक्षी कांग्रेसले सुप्रिम, सूर्यदर्शनलगायत सहकारीको बचत अपचलनमा गृहमन्त्रीकै संलग्नता देखिएको भन्दै छानबिन समितिको कार्यादेशमा गृहमन्त्री रवि लामिछानेको नाम उल्लेख गरेर क्षेत्राधिकार तय गर्नुपर्ने अडान राखेको छ।
तर सत्तापक्षले भने संसदीय समिति बनाउनुपूर्व नै व्यक्तिलाई दोषी करार गर्न नहुने अडान राखेको छ। यही अडानका कारण शुक्रबार बिहानको कार्यदलको छलफल निष्कर्षमा पुग्न सकेको थिएन।
कार्यदलमा सहमति नजुटेपछि नेताहरू बालुवाटार पुगेका छन्।
बालुवाटारमा शीर्ष नेताहरूसहितको बैठक जारी रहेको एमाले प्रमुख सचेतक महेश बर्तौलाले जानकारी दिए।