सत्तारूढ राष्ट्रिय स्वतन्त्र पार्टी (रास्वपा) का सांसद स्वर्णिम वाग्लेले बिपी कोइरालाको नाम लिँदै प्रमुख प्रतिपक्षी नेपाली कांग्रेसलाई लक्षित गरी सदनमा लज्जास्पद र औचित्यहीन विरोध गरेको भनेपछि हो-हल्ला भएको छ।
आइतबारको प्रतिनिधि सभा बैठकमा नीति तथा कार्यक्रममाथि छलफलमा भाग लिएका वाग्लेले रोस्टममा पुगेपछि बिपी कोइरालाले स्थापित गरेको मानकलाई लज्जास्पद र औचित्यहीन अवस्थामा पुर्याइए भन्दै खेद प्रकट गरेका थिए।
रास्वपा उपसभापतिसमेत रहेका वाग्लेले बिपीको नाम लिएर कांग्रेसले गरिरहेको नाराबाजी र वेल घेराउप्रति लक्षित गर्दै लज्जास्पद र औचित्यहीन भनेका थिए। बोल्ने क्रममा वाग्लेले चार पटकसम्म लज्जास्पद भन्ने शब्द प्रयोग गरेका थिए।
वाग्लेले बिपीको नाम लिएको भन्दै वेल घेराउ गरिरहेका कांग्रेस सांसदहरूले हो-हल्ला गरेका छन्।
‘यो असहज वातावरणमा यसरी गरिमामय संसदमा उपस्थित भएर बोल्न पर्लाजस्तो मलाई लागेको थिएन,’ सांसद वाग्लेले भने, ‘६५ वर्षअगाडि नेपाली लोकतान्त्रिक आन्दोलनका धरोहर, हामी सबैका प्रेरणा। मेरा त राजनीतिक आदर्श बिपी कोइरालाले स्थापित गर्नुभएको मानकलाई आज यो अवस्थामा पुर्याउनलाई, यो लज्जास्पद र औचित्यहीन विरोधप्रति मेरो घोर खेद छ।’
साथै वाग्लेले ७४ लाख सहकारी बचतकर्ताहरूको समस्या समाधान गरिनुपर्ने बताएका थिए। वाग्लेले यसो भनिरहँदा सभामुख देवराज घिमिरेले 'माननीय सदस्य विषयमा केन्द्रित भएर आफ्नो अभिव्यक्ति दिनुस्' भनेका थिए।
सांसद वाग्लेले सहकारीबारे समाधान उन्मुख हुने हो कि व्यक्ति केन्द्रित भएर खराब नजिर बनाउने भन्ने नै मूल मुद्दा रहेको बताएका थिए। सहकारीमा संसदीय छानबिन समिति बनाउने र त्यसको कार्यादेशबारे कुरा भइरहेको उनको भनाइ थियो। ‘औचित्यहीन र कर्मकाण्डी विरोधको औचित्य छैन,’ उनले भनेका थिए।
सभामुख घिमिरेले फेरि वाग्लेलाई विषयमा केन्द्रित हुन भनेका थिए।
वाग्लेले नीति तथा कार्यक्रमप्रति आफ्नो पार्टीको पूर्ण समर्थन रहेको बताएका थिए।
भिडिओ: