उपप्रधान मन्त्रीसमेत रहेका भौतिक पूर्वाधार तथा यातायातमन्त्री रघुवीर महासेठले काठमाडौं महानगरपालिकाले न्युरोड क्षेत्रमा गरिरहेको क्रियाकलाप कानुनसम्मत नभएको बताएका छन्।
न्युरोड क्षेत्रका सडक महानगरले तोडफोड गरेको पनि उनले बताए।
‘न्युरोडमा सडक तोडफोड भएको थियो। त्यसलाई सडक विभागले रोकेको हो,’ संघीय संसद भवनअगाडि आइतबार पत्रकारहरूसँग मन्त्री महासेठले भने, ‘कलंकीदेखि महाराजगञ्जको सडकको कुरा मेयर बालेन शाहले उठाउनु भएको छ। त्यसमा मेरो आपत्ति छैन।’
तर न्युरोडमा भइरहेका क्रियाकलाप भने कानूनसम्मत नभएको उनले बताए।
महानगरले शनिबार सडक विभागको गेटमा धुलो फालेको थियो।
‘जुन धुलो फालिएको छ, त्यसप्रति हाम्रो अहिले कुनै कमेन्ट छैन। चक्रपथ मित्रराष्ट्र चीनसँगको सम्झौतामा भएको हो। उहाँहरुले बनाउदिन भनेपछि नेपाल सरकारले बनाउँछौँ,’ उनले भने, ‘मेयरले स्टाटसमा लेखेको कुरा सत्यता छैन।’
चीनसँग पूरै रिङरोड बनाउने सम्झौता भएको पनि उनले बताएका थिए।
‘यद्यपि नेपाल सरकारले आफ्नो आन्तरिक बजेटबाट पनि यसपालि केही निर्माण गर्न बजेट व्यवस्थापन गरिसकेका छौँ। जुन प्रकारले अहिले काठमाडौं महानगरले आफ्नो क्रियाकलाप देखाउनुभएको छ, त्यसप्रति हामीले सरसल्लाह गर्दैछौँ,’ उनले भने।
यो पनि: बालेन र सडक डिभिजनको झगडाको जड रिङरोड कि न्यूरोड?
