संसदीय छानबिन समितिको कार्यादेशलाई अन्तिम रूप दिन कार्यदलको बैठक बसिरहेको छ।
सहकारीको बचत अपचलन छानबिन गर्ने समितिको कार्यादेश टुंग्याउन कार्यदलको बैठक बसिरहेको हो।
कार्यदल बैठकमा कानून, न्याय तथा संसदीय मामिला मन्त्री पदम गिरी, नेकपा (एमाले) का प्रमुख सचेतक महेश बर्तौला, माओवादी केन्द्रमा प्रमुख सचेतक हितराज पाण्डे छन्। प्रमुख प्रतिपक्षी नेपाली कांग्रेसका सांसद जीवन परियार, ज्ञानेन्द्रबहादुर कार्की, राष्ट्रिय स्वतन्त्र पार्टीका सांसद शिशिर खनाल सहभागी छन्।
बालुवाटारमा सोमबार राति बसेको शीर्ष नेताहरूको बैठकले कार्यादेशमा मोटामोटी सहमति गरेको दुवै पक्षका नेताले बताएका थिए।
अहिले बसिरहेको बैठकले कार्यादेशलाई अन्तिम रूप दिने र मंगलबारबाटै संसदको गतिरोध अन्त्य हुने उनीहरूले दाबी उनीहरूले गरेका थिए।
एक साताअघि नै संसदीय छानबिन समिति गठनबारे सैद्धान्तिक सहमति जुटे पनि कार्यादेशमा कुरा मिलेको थिएन।
प्रमुख प्रतिपक्षी नेपाली कांग्रेसले सहकारीको बचत हिनामिनामा उपप्रधान तथा गृहमन्त्री रवि लामिछाने नै संलग्न रहेको भन्दै नाम तोकेर समिति बनाउनुपर्ने अडान राख्दै आएको छ।
सत्तापक्ष भने समिति बन्नुअगावै व्यक्तिलाई दोषी किटान हुने गरी नाम उल्लेख गर्न नहुने अडानमा छ। यो विवादले संसदको गतिरोध जारी छ। प्रमुख प्रतिपक्षी नेपाली कांग्रेसको अवरोधकै बीच सरकारको नीति तथा कार्यक्रम पारित गरिएको थियो।
संसदको यही गतिरोध अन्त्य गर्न प्रधानमन्त्री पुष्पकमल दाहाल ‘प्रचण्ड’ सहित शीर्ष नेताहरूको बैठक बसेको थियो।
सोमबार राति अबेर सकिएको बैठकले कार्यादेशमा गृहमन्त्री लामिछानेको नाम किटान नगरे पनि रकम हिनामिना गरिएका सुप्रिम, सूर्यदर्शन, सहारा लगायतका सहकारी र लामिछाने आबद्ध गोरखा मिडियाको नाम उल्लेख गर्नेबारे लगभग सहमति भएको एक कांग्रेस नेताले बताए।
‘विभिन्न सहकारीबाट गोरखा मिडियामा प्रवाह भएको रकमबारे अध्ययन गर्ने र अपचलनमा संलग्न देखिए कारबाही गर्ने सहमति भएको छ,’ बैठकमा सहभागी एक कांग्रेस नेताले भने, ‘कार्यादेशको भाषा कस्तो हुन्छ भन्नेबारे मंगलबारको बैठकले टुंगो लगाउनेछ।’
संसदीय छानबिन समितिमा कांग्रेस र एमालेका २–२ जना, माओवादी, रास्वपा र राप्रपाका १–१ जना गरी ७ सदस्य रहनेबारे पनि छलफल भएको उनले जानकारी दिए। समितिलाई छानबिन टुंगो लगाउन करिब तीन महिना समय दिने कुरा भइरहेको छ।
कार्यदल संयोजक तथा कानुन तथा संसदीय मामिला मन्त्री पदम गिरीले करिब तीन घन्टा चलेको बैठक सहमति नजिक पुगेको बताएका थिए।
बैठकमा सहभागी नेकपा एमालेका प्रमुख सचेतक महेश बर्तौलाले बालुवाटार बैठक निष्कर्ष उन्मुख हुँदै समापन भएको बताए थिए।
नेपाली कांग्रेसका प्रमुख सचेतक लेखकले पनि बैठक सकारात्मक भएको र मंगलबारको कार्यदल बैठकले कार्यादेशलाई अन्तिम रूप दिने बताए।
सोमबारको बैठकमा प्रधानमन्त्री प्रचण्डसहित प्रमुख प्रतिपक्षी नेपाली कांग्रेसका उपसभापति पूर्णबहादुर खड्का, राष्ट्रिय सभा दलका नेता कृष्ण सिटौला, महामन्त्री गगन थापा र प्रमुख सचेतक रमेश लेखक सहभागी थिए। त्यस्तै कांग्रेस सांसद ज्ञानेन्द्रबहादुर कार्की र कार्यदलका सदस्य जीवन परियार पनि थिए।
नेकपा एमालेबाट उपाध्यक्ष विष्णु पौडेल, कानुनमन्त्री पदम गिरी, प्रमुख सचेतक महेश बर्तौला र माओवादी केन्द्रबाट अर्थमन्त्री वर्षमान पुन, प्रमुख सचेतक हितराज पाण्डे सहभागी थिए।
राष्ट्रिय स्वतन्त्र पार्टीबाट सभापति एवं उपप्रधान तथा गृहमन्त्री रवि लामिछाने, उपसभापति स्वर्णिम वाग्ले, प्रमुख सचेतक सन्तोष परियार लगायत सहभागी थिए।
-1742801159.jpg)
