प्रमुख प्रतिपक्षी नेपाली कांग्रेसकी सांसद ईश्वरीदेवी न्यौपानेले चप्पल लगाएका जनतालाई संसद भवन छिर्न किन रोकेको हो भन्दै प्रश्न गरेकी छन्।
प्रतिनिधि सभाको आइतबारको बैठक सुरू भएपछि सभामुख देवराज घिमिरेसँग समय मागेर बोलेकी न्यौपानेले चप्पल लगाएका नागरिकलाई संसद भवनमाथि जान नदिइएको भन्दै ध्यानाकर्षण गराएकी हुन्।
‘जनताहरू काठमाडौंसम्म आइपुग्न पनि गाह्रो हुन्छ। बल्ल काठमाडौं आएका जनता संसद भवन हेर्न पनि चाहन्छन्। संसद भवनमा आएर माथि जान लाग्दा रोकिन्छ, कारण के हो मैले बुझ्न सकिनँ। त्यसपछि मैले सोधे किन उहाँहरूलाई माथि जानबाट रोकियो?,’ उनले भनिन्, ‘खुट्टामा चप्पल लगाएका छन् त्यसकारण माथि जान पाउँदैनन् भनियो। सरकारको नियम होला भनेर मनमा दबाएर राखेँ।’
नियम बनाउने ठाउँमा रहेका सांसदहरू भने चप्पल लगाएर संसद भवनमा आइरहेको तर नागरिकलाई भने रोकिएको उनको भनाइ छ।
यसपछि न्यौपानेले अर्को घटना पनि सुनाइन्।
हाफ पाइन्ट लगाएका नागरिकलाई किन सिंहदरबार छिर्नबाट रोक्ने गरिएको भन्ने प्रश्नसमेत गरेकी छन्।
‘अस्ति एक भाइको मोटरसाइकलमा सिंहदरबार गएँ। गेटमा आइडी देखाएँ। तर पछि प्रहरी दगुर्दै मेरो पछिपछि आइराखेपछि मैले बाइक रोक्न भने र उत्रिएँ। किन दौडिएको म सांसद हुँ, आइडी देखाएर आएको हुँ,’ उनले भनिन्, ‘माननीयज्यू तपाईंलाई होइन बाइक चलाउने भाइलाई रोकेको भन्नुभयो। किन भन्दा त्यो भाइले हाफ पाइन्ट लगाएको छ जान पाउँदैन भनियो।’
उनले संसदमा मर्यादित पोसाक लगाएर आउने कति जना छन् भन्ने प्रश्न पनि गरेकी छन्।
‘सांसदलाई चाहिँ चप्पल र जस्तो पोसाक लगाए पनि छुट, जनतालाई चाहिँ त्यसमा बन्देज?,’ उनले प्रश्न गरिन्, ‘विचरा जनताहरू! चप्पल लगाएर संसद आउन नपाउने? हाफ पाइन्ट लगाएर सिंहदरबार जान नपाउने? यसमा सभामुखमार्फत रूलिङ चाहन्छु।’
उनले जनतालाई चप्पल लगाएको र हाफ पाइन्ट लगाएकै भरमा किन रोकियो भन्ने जबाफ पनि माग गरेकी छन्।
भिडिओ:
