प्रमुख प्रतिपक्षी दल नेपाली कांग्रेसका सांसद रामहरि खतिवडाले मुलुक हुकुमी शासनले नचल्ने बताएका छन्।
आइतबार प्रतिनिधि सभा बैठकको विशेष समयमा बोल्दै सांसद खतिवडाले गृहमन्त्री रवि लामिछानेप्रति लक्षित गर्दै जुनसुकै निर्णय गर्दा र कार्यान्वयन गर्दा कानुन अनुसार हुनुपर्ने बताएका हुन्।
उनले गृहमन्त्री लामिछानेले महिला ट्राफिक प्रहरीलाई महिनावारीको समयमा चार दिन बिदा दिने र मापसे गरी सवारी चलाउनेलाई सडकमा स्वयंसेवकका रूपमा खटाउने निर्णय कानुन अनुसार हुनुपर्ने बताए।
'महिनावारी हुँदा चार दिन विदा दिने निर्णय कानुन बनाएर गर्दा राम्रो। यसलाई हामी स्वागत गर्छौं र राम्रो कामलाई धन्यवाद पनि दिन्छौं,' उनले भने।
ट्राफिक नियम उल्लंघन गर्नेलाई सडकमा खटाउने निर्णयलाई भने तत्काल फिर्ता लिन सांसद खतिवडाले माग गरे।
'मापसे गरेका मान्छेलाई सडकमा ल्याएर उभ्याउने अरे। कुन कानुन र नियममा छ? गृह मन्त्रालयले त्यो नियमावली अनुसार प्रहरीलाई पठाएको छ कि? गृहमन्त्रालयलाई पत्राचार भएको छ कि?,' उनले भने।
ट्राफिक व्यवस्थापनमा स्वयंसेवकका रूपमा विद्यार्थी खटिएको, विदेशी खटिएको देखिएपनि मापसेमा कारबाही परेको व्यक्तिलाई सडकमा स्वयंसेवकको रूपमा खटाउन नहुने उनले बताए।
'मापसेमा लरबर हुँदै ट्राफिकको काम गर्ने? पहेँलो ज्याकेट लाउने मान्छेहरू सबै मापसेयुक्त हुन् भन्ने भान भयो भने मुलुक कता जान्छ? तिनिहरूको इज्जत सडकमा रहन्छ रहँदैन। यो काम तत्काल बन्द गरी कानुनअनुसार शासन चलाउने व्यवस्था होस्,' खतिवडाले भने।
सांसद खतिवडाले हुकुमी शासनविरूद्ध लडेर आएको आफूहरूलाई फेरि हुकुमी शासन मान्य नहुने बताए।
'अहिले पनि पत्रकारिता चलाएजस्तो बोलेर, ट्वीट गरेर मुलुक चलाउने होइन, कानुनअनुसार देश चलाउने पद्धतिको माग गर्नुपर्छ,' उनले भने।
