राष्ट्रिय स्वतन्त्र पार्टीका सांसद मनिष झाले गिरिबन्धु टी इस्टेट, टेरामक्स आदि प्रकरणको फाइल खोल्न चाहेको बताएका छन्।
प्रतिनिधि सभाको आजको बैठकमा विशेष समय लिएर बोल्दै उनले संसदीय छानबिन समिति बनाउन हुन्न भन्नेमा आफ्नो पार्टी नरहेको बताए। २०५४ सालदेखि अहिलेसम्म १५ वटा समिति बनेको, ती सबै समितिमा व्यक्ति किटान नगरिएको चर्चा गर्दै उनले रास्वपा सभापति रवि लामिछानेकोचाहिँ नाम किन उल्लेख गर्नुपर्ने भनेर चासो रहेको बताए।
‘हाम्रो केही सरोकार पनि छन्। हामी संलग्न कुनै अभियोगहरूमा यति आवाज उठाउँदै गर्दा मेरा पनि केही आवाजहरू छन्,’ उनले भने, ‘बाल मन्दिरको जग्गा, बाँसबारीको जग्गा, टीकापुरको जग्गा, गिरिबन्धु, टेरामक्सको फाइल खोल्न चाहन्छौं,’ उनले भने।
उनले विगतमा यी प्रकरणको फाइल नै नबनेकाले खोल्न नसकेको पनि बताए।
उनले रास्वपा राजनीतिमा आएको २३ महिना, संसद प्रवेश गरेको १७ महिना र सरकारमा १२२ दिन रहेकाले सिक्ने क्रममै रहेको पनि बताए।
‘हामी राजनीतिमा आएको २३ महिना भयो। सदनमा आएको १७ महिना भयो। सरकारमा आएको दुई पटक गरेर १२२ दिन भयो। तर अहिले केही दल र दलका केही अग्रज यो सबै तिमीहरूले नै बिगार्यौ भनेर आफू पन्छिन खोज्ने प्रयासहरू पनि देखिन्छ। सदनमै देखिन्छ। आज पनि देखियो। हामीभन्दा लगभग २६ हजार ९३४ दिन जेठो पार्टीलाई तिमीले नै सबै चिज बिगार्यौ। अब हामी सपार्छौं भनेर क्रेडिट लिन आएका होइनौं,’ उनले भने।
भिडिओ:
