नेपाली कांग्रेसले कोशी प्रदेशको संसदीय दललाई प्रदेशसभा बैठकमा सहभागी बन्न निर्देशन दिएको छ।
कोशीमा सोमबार सरकारको वार्षिक नीति तथा कार्यक्रम प्रस्तुत हुँदैछ। कांग्रेसले अहिलेसम्म बर्खे अधिवेशनको कुनै पनि बैठकमा सहभागिता जनाएको छैन। सरकारबारेको विवाद अदालतमा विचाराधीन रहेको भन्दै कांग्रेसले प्रदेश संसद बैठक स्थगनको माग गर्दै आएको थियो।
गएको बिहीबार काठमाडौंमा भएको कांग्रेस पदाधिकारी बैठकले प्रदेशसभा बैठकमा सहभागी हुन कांग्रेस संसदीय दललाई निर्देशन दिने निर्णय गरेको कांग्रेसका एक पदाधिकारीले जानकारी दिए।
‘बैठकमा सहभागी हुने औपचारिक निर्णय प्रदेश संसदीय दल स्वयंले सोमबार गर्नेछ,’ ती पदाधिकारीले भने, ‘बिहीबारको पदाधिकारी बैठकले प्रदेशसभा बैठकमा उपस्थित हुन भनिसकेको छ। सोमबारदेखि कोशीमा कांग्रेसले प्रदेशसभामा सहभागिता जनाउनेछ।’
कांग्रेस केन्द्रकै निर्देशन अनुसार कोशी संसदीय दलले बैठकमा अनुपस्थिति जनाउँदै आएको थियो।
‘अब सरकारबारेको विवादमा अदालतको विषय अदालतमै प्रतिवाद गर्ने र सदनमा सहभागिता जनाउने निर्णय भएको छ,’ ती पदाधिकारीले भने, ‘अब कांग्रेसले संसद बैठक छाड्दैन।’
ती पदाधिकारीका अनुसार तत्कालीन मुख्यमन्त्री केदार कार्की पक्षधर सांसदहरू बैठकमा उपस्थित नहुने पक्षमा भए पनि बहुमत सांसद बैठकमा सहभागी बन्नुपर्ने अडानमा छन्। सोही अनुसार निर्णय भएको र सोमबार केन्द्रबाट केन्द्रीय प्रतिनिधि पठाएर प्रदेश संसदीय दलले बैठकमा सहभागिता जनाउने निर्णय गर्ने उनले जानकारी दिए।
कांग्रेस कोशी संसदीय दलले सरकार बारेको विवाद अदालतमा विचाराधीन रहेको भन्दै प्रदेश सभा बैठकमा लगातार अनुपस्थित रहँदै आएको छ। वैशाख ३१ मा सुरू भएको बर्खे अधिवेशनमा हालसम्म तीन वटा बैठक भइसकेका छन्।
वैशाख २७ मा मुख्यमन्त्री हिक्मत कार्की नेतृत्वको सरकार गठन भएपछि त्यसको गठन प्रक्रियामा असन्तोष जनाउँदै तत्कालीन मुख्यमन्त्री एवं कांग्रेस सांसद केदार कार्की अदालत गएका थिए। सर्वोच्चमा जेठ २३ मा मुद्दाको पेशी तोकिएको छ।
