राष्ट्रिय जनमोर्चाका सांसद चित्रबहादुर केसीले बजेटमाथिको छलफल चल्दै गर्दा दिक्क लागेर आफू एकछिन निदाएको बताएका छन्।
प्रतिनिधि सभाको सोमबारको बैठकमा बजेटमाथि छलफल जारी छ।
बजेटमाथिको छलफलमा भाग लिँदै रोस्टम पुगेर बोलेका केसीले अर्थमन्त्रीले पेस गरेको बजेट जति छलफल गरे पनि तलमाथि नहुने भएकोले छलफल औचित्यहीनजस्तो देखिएको पनि बताए।
‘यहाँ जति उफ्रे पनि सत्तापक्षले पेस गरेको बजेट एक सुका, एक आना तलमाथि गर्न नपाइने, यहाँ जे आएको छ त्यसलाई स्वीकार गर्नुपर्ने भएपछि छलफलको पनि औचित्य लाग्न छाड्यो,’ केसीले भने, ‘आज यही छलफलको कुरा सुन्दा वाक्क लागेर निदाएछु एकछिन। यस्तो पो हुन गयो। रमाइलो छैन संसद, दिक्क लाग्दो छ।’
केसीले समाजवादउन्मुख बजेट नआएको पनि टिप्पणी गरेका छन्।
