नेकपा (एमाले) मकवानपुर अध्यक्षमा श्रीधर पोखरेल निर्वाचित भएका छन्।
उनले ३१३ मत ल्याएर निर्वाचित भएका हुन्। निकटतम प्रतिस्पर्धी इन्द्रमान स्याङतानले २६२ मत ल्याए।
अध्यक्षमा निर्वाचित भएका पोखरेल एकीकृत समाजवादीबाट एमाले फर्किएका थिए।
उनलाई बागमती प्रदेश कमिटीको अध्यक्षमा पराजित भएका कृष्ण दाहालले समर्थन गरेका थिए।
स्याङ्तानलाई निवर्तमान जिल्ला अध्यक्ष एकलाल श्रेष्ठ, डोरमणि पौडेलका साथै जिल्ला पार्टी इन्चार्ज देवी ज्ञवालीको पनि समर्थन थियो।
स्याङतानलाई पार्टी अध्यक्ष केपी शर्मा ओलीसमेतको समर्थन रहेको नेताहरूले बताएका छन्।
उपाध्यक्षमा हिदम लामा निर्वाचित भएका छन्। उनले ४७६ मत ल्याए। लामा भिमफेदी गाउँपालिकाका अध्यक्ष पनि हुन्।
उनका निकटतम प्रतिस्पर्धी सुनील मोक्तानले १९७ मत ल्याए।
सचिवमा सीता विष्ट निर्वाचित भइन्। उनले २९७ मत पाउँदा निकटतम प्रतिस्पर्धी मदन दाहालले २५५ मत पाए। खुला उपसचिव फुर्वा दोर्जे लामा २४१ मत ल्याएर निर्वाचित भए।
महिला उपसचिव आरती पाठक २४१ मतसहित निर्वाचित भएकी छन्।
जिल्ला अधिवेशनमा कुल ७७७ जना प्रतिनिधिमा ७६५ मत खसेको निर्वाचन समितिले जानकारी दिएको छ।
