मन्त्री नियुक्तिकाे विषयलाई लिएर सुदूरपश्चिममा माओवादीभित्र विवाद बढेको छ।
नेकपा माओवादी केन्द्र सुदूरपश्चिम प्रदेश सभाका सांसद खगराज भट्ट सहितका पाँच जनाले तत्काल मन्त्री नियुक्ति राेक्न माग गर्दै पत्र समेत बुझाएका छन्।
सांसद भट्टका अनुसार माओवादीबाट संसदीय दलका नेता मानबहादुर धामीले एकलाैटी रूपमा मन्त्री नियुक्तिका लागि पठाएका नाम सच्याएर लग्नुपर्ने भन्दै तत्काल मन्त्री नियुक्ति राेक्न मुख्यमन्त्री दीर्घ साेडारीलाई उनीहरूले पत्र बुझाएका हुन्।
मन्त्री नियुक्ति राेक्न माग गर्ने सांसदहरूमा भट्टसहित झपटबहादुर साउद, शिवसिंह ओली, रमेशसिंह धामी र जानकी कुँवरकाे हस्ताक्षर छ।
‘हामीले तत्काल मन्त्री नियुक्त राेक्न सबैतिर पत्र पठाएका छाैं, एकलाैटी रूपमा मन्त्रीका लागि सिफारिस गरेका नाम सच्याउनु पर्छ, सहमतिमा गराैं, दलकाे बैठक बसेर विधि अनुसार गराैं मन्त्रीका लागि पात्र छानाैं भन्ने हाम्रो भनाइ हाे, तर त्यसाे भएन, हाम्रो यसमा असहमति छ, हामी छलफलमै छौं,’ सांसद भट्टले भने।
भट्ट पक्षका सांसदले मन्त्री राेक्न माग गरे पनि साेमबार नै मुख्यमन्त्री दीर्घ साेडारीले माओवादीबाट सामाजिक विकास मन्त्रीमा ओमविक्रम भाट 'सरल', अक्कल रावल र लक्ष्मी विकलाई बिना विभागीय मन्त्रीमा नियुक्त गरेका छन्।
यस्तै, नेकपा एमालेबाट आर्थिक मामिला मन्त्रीमा सुरेन्द्र पाल, विना विभागीय मन्त्रीमा वीरबहादुर थापा र हिरा सार्कीलाई नियुक्त गरेका छन्।
बिना विभागीय मन्त्रीमा एकीकृत समाजवादी पार्टीका माया पन्त पनि नियुक्त भएकी छन् भने उद्योग, वन तथा वातावरण मन्त्रीमा स्वतन्त्र सांसद ताराप्रसाद जाेशीलाई मुख्यमन्त्री साेडारीले नियुक्त गरेका हुन्।
उनीहरूकाे शपथ आजै गराउने तयारी भइरहेको प्रदेश प्रमुख कार्यालयले जनाएको छ।
नेकपा माओवादीभित्र केही समययता विवाद देखिएको छ। माओवादीभित्र संसदीय दलकाे नेताकाे विषयमा विवाद सुरूदेखि नै कायमै छ।
माओवादी संसदीय दलका नेता बनेका खगराज भट्टलाई एकाएक हटाएर मानवहादुरलाई जिम्मेवारी दिइएकाे थियाे। दलका नेताबाट हटाइएपछि खगराज असन्तुष्ट छन्। बीचमा उनलाई संसदीय दलकाे नेताभन्दा माथिकाे दर्जा दिइने माओवादीभित्र सहमति भएको थियाे। तर अहिले फेरि मन्त्री नियुक्तिकाे विषयमा विवाद देखिएको छ।