कोशी प्रदेश सरकारले सोमबार प्रदेश योजना आयोगमा चार सदस्य नियुक्त गरेको छ।
सत्तारूढ नेकपा एमाले र नेकपा माओवादी केन्द्रले दुई-दुई जना भागबन्डा गरेर सदस्य नियुक्त गर्दा गायक, पत्रकारदेखि स्थानीय चुनावमा उपप्रमुख पदमा दुई पटक पराजित उम्मेदवारसम्म समेटिएका छन्।
सोमबारको कोशी प्रदेश मन्त्रिपरिषद बैठकले प्रदेश योजना आयोगमा एमालेका तर्फबाट झापा गौरादह घर भई काठमाडौं बस्दै आएका डा. सिताराम बस्नेत र किशोरकुमार राईलाई सदस्यमा नियुक्त गरेको छ। डा. बस्नेत कृषि क्षेत्रका विज्ञ भएको जानकारी प्रदेश सरकारले दिएको छ।
त्यस्त धरानका राई ‘जनवादी गायक’ हुन्। किशोर थुलुङका नामले संगीत क्षेत्रमा परिचित उनको 'खोकु छिन्ताङ दुख्यो कि अरूण सुसाउँदा' भन्ने गीत वाम वृत्तमा चर्चित छ। उनी धरानको महेन्द्र बहुमुखी क्याम्पसमा आम सञ्चार विषय पढाउँछन्।
यस्तै माओवादी कोटाबाट सदस्यमा नियुक्त भवानी बराल पत्रकार हुन्। धरानकै बासिन्दा उनी २०७४ प्रेस काउन्सिलमा अध्यक्ष बनेका थिए। तर विवादमा परेपछि उनले राजीनामा दिएका थिए।
माओवादी कोटाबाटै सदस्य नियु्क्त विराटनगरकी नमिता न्यौपाने नेता हुन्। २०७४ र २०७९ सालको स्थानीय निर्वाचनमा विराटनगर महानगरको उपमेयरमा चुनाव लडेकी उनी दुवैपटक पराजित बनेकी थिइन्। २०७९ को स्थानीय चुनावमा उनले माओवादी छाडेर चुनाव लडेकी थिइन्। महानगर सचिव त्यागेर स्वतन्त्र चुनाव लडेकी उनी केही समयपछि फेरि माओवादीमै सक्रिय भएकी थिइन्।
प्रदेश मन्त्रिपरिषदले आर्थिक मामिला तथा योजना मन्त्री रामबहादुर मगरको संयोजकत्वमा राजनीतिक तथा शान्ति वार्ता समिति पनि गठन गरेको छ। सदस्यमा भौतिक पूर्वाधार विकासमन्त्री गणेशप्रसाद उप्रेती र आन्तरिक मामिला तथा कानुनमन्त्री लिलाबल्लभ अधिकारी सदस्य छन्। समितिको सदस्य सचिवमा आन्तरिक मामिला तथा कानुन मन्त्रालयका सचिव लक्ष्मीप्रसाद पौडेललाई तोकिएको मन्त्री अधिकारीले जानकारी दिए।
