नयाँ नेतृत्व चयनका लागि नेकपा (एमाले) काठमाडौंमा मंगलबार निर्वाचन हुँदैछ।
अहिले मध्याह्न १२ बजेबाट नेतृत्व चयनका लागि विद्युतीय मतदान हुने निर्वाचन समितिले जानकारी दिएको छ।
एमाले काठमाडौंको नयाँ नेतृत्वका लागि निवर्तमान अध्यक्ष दीपक निरौला र निर्मल देउला समूह बनाएरै प्रतिस्पर्धा गर्दैछन्।
अध्यक्षमा दुई जनाको मात्रै उम्मेदवारी परेको छ। सहसचिव भने निर्विरोध भइसकेको निर्वाचन समितिले जानकारी दिएको छ।
निरौला समूहबाट विश्वराम सापकोटाले उपाध्यक्षमा उम्मेदवारी दिएका छन्। देउला समूहबाट काठमाडौं महानगरपालिका वडा नम्बर ३२ का अध्यक्ष नवराज पराजुलीले उम्मेदवारी दिएका छन्। उपाध्यक्षमा विदुरविक्रम खड्का र नवराज भट्टले पनि उम्मेदवारी दिएका छन्।
सचिवमा निरौला समूहबाट राजेश शाक्य र देउला समूहबाट सत्यनारायण डंगोलले उम्मेदवारी दिएका छन्।
महिला उपसचिवमा विन्दु महर्जन निर्विरोध भइसकेकी छन्। खुलातर्फ भने उद्धव भण्डारी र गुञ्जमानसिंह बस्नेतले प्रतिस्पर्धा गर्दैछन्। बस्नेत देउला समूहबाट हुन् भने भण्डारी निरौला समूहबाट उम्मेदवारी दिएका छन्।
शनिबार सुरू भएको सातौं जिल्ला अधिवेशनमा ५८५ जना प्रतिनिधि छन्। अधिवेशनबाट पाँच सदस्यीय लेखा कमिटीसहित २३० सदस्यीय कमिटी निर्वाचित हुन लागेको हो।
चार वटा ४० वर्ष मुनिको युवा क्लस्टरमा उम्मेदवारी नै परेको छैन। विभिन्न क्लस्टरबाट १०० जना निर्विरोध भइसकेको निर्वाचन समितिले जानकारी दिएको छ।
