चीनले महत्त्वपूर्ण धातु र खनिजको निर्यात रोकेको छ।
अमेरिकासँग बढ्दो व्यापार युद्धकाबीच चीनले विशेष धातु र दुर्लभ प्रकृतिका खनिज र चुम्बकोको निर्यात तत्कालका लागि रोकेको हो।
रकेटदेखि मिसाइलसम्मका हतियार बनाउन, कार कम्पनी, एयरोस्पेस निर्माता र सेमिकन्डक्टर उत्पादनमा अत्यावश्यक धातु र दुर्लभ खनिजहरूको निर्यात तत्कालका लागि रोकिएको हो।
अमेरिकी पत्रिका द न्युयोर्क टाइम्सका अनुसार चीनले त्यस्ता धातु र खनिज पदार्थ निर्यात गर्न रोक लगाएपछि पानीजहाजहरू अहिले चीनको विभिन्न बन्दरगाहमा रोकिएर बसेका छन्।
त्यस्ता सामग्री निर्यात नियमनका लागि नयाँ नीति मस्यौदा भइरहेकाले तत्कालका लागि निर्यात रोकेको बताइएको छ।
चीनले त्यस्ता धातु र खनिज ठूलो मात्रामा अमेरिका निर्यात गर्छ। अमेरिकी राष्ट्रपति ट्रम्पले अन्य देशलाई पारस्परिक भन्सार ९० दिनका लागि रोके पनि चीनका लागि भने लगातार बढाएर १४५ प्रतिशत पुर्याएका छन्।
चीनको उक्त कदममा अमेरिकाको पारस्परिक भन्सार नीति कारक मानिएको छ।
चीनले सात किसिमका खनिजहरू अप्रिल ४ देखि निर्यातमा रोक लगाएको थियो।
यस्ता खनिजहरू अरू मुलुकहरूमा नपाइने होइन तर चीनले उत्खनन्, प्रशोधन र आपूर्तिमा लगभग एकाधिकार कायम गरेको छ।
ट्रम्पले दोस्रो कार्यकालका लागि जिम्मेवारी सम्हालेपछि त्यस्ता खनिजहरू चीनले आपूर्ति रोक्न सक्ने आकलन गरेरै युक्रेनलाई खनिज सम्झौता गर्न बाध्य बनाएका थिए।
खनिज सम्झौता गर्नकै लागि भनेर ह्वाइट हाउस पुगेका युक्रेनी राष्ट्रपति भोलोदिमिर जेलेन्स्कीसँग ट्रम्प र उनका उपराष्ट्रपति जेडी भान्सबीच चर्काचर्की भएपछि सम्झौतामा हस्ताक्षर भने भएन।
यद्यपि जेलेन्स्कीले युद्धविराम भएर युक्रेनको सुरक्षा ज्ञारेन्टी भए अझै अमेरिकासँग खनिज सम्झौता गर्न तयार रहेको बताउँदै आएको छ।
रूस-युक्रेन युद्ध अन्त्यको वार्ताका क्रममा रूसले पनि आफ्नो त्यस्ता दुर्लभ खनिज अमेरिकालाई दिन सक्ने भनेको थियो।
यद्यपि ३० दिन युद्धविराम गर्ने ट्रम्पको प्रस्तावलाई रूसले अस्वीकार गरिदिएपछि ती सबै कुराहरूमा थप छलफल भएको छैन।
-1746009348.jpg)
