बुधबार बिहान १:०५ देखि १:३० बजेसम्म भारतले पाकिस्तानका नौ ठाउँमा लक्ष्य गरेर मिसाइल आक्रमण गरेको भोलिपल्ट पाकिस्तानले पनि भारतमा हवाइ आक्रमण गरेको छ।
बिहीबार बेलुका पाकिस्तानले भारतका पश्चिमी र उत्तरी भूभागहरुमा लक्ष्य गरेर हवाइ आक्रमण गरेको छ।
ती क्षेत्रमा कैयौं टार्गेटमा पाकिस्तानी हमला निष्क्रिय पारेको भारतले दाबी गरेको छ।
भारतले पनि पाकिस्तानमा मिसाइल र ड्रोनहरूले आक्रमण गरेको छ। पाकिस्तानका रक्षामन्त्री खवाजा असिफले भारतका २५ वटा ड्रोन खसालेको बताएका छन्। लाहोर, रावलपिण्डी र कराची लगायतका क्षेत्रबाट पाकिस्तानी सेनाले ड्रोन र मिसाइल झारेको उनले बताएका छन्।
भारत-पाकिस्तानबीच ड्रोन र मिसाइल प्रहार भएपछि रातभरि के-के भए भनेर यहाँ बुँदागत रूपमा चर्चा गरौं −
१. लाहोरको एयर डिफेन्स नष्ट
भारतले ड्रोन र मिसाइल आक्रमण गरेर लाहोरको एयर डिफेन्स प्रणाली नष्ट पारेको दाबी गरेको छ। भारतको रक्षा मन्त्रालयले बिहीबार पाकिस्तानका धेरै एयर डिफेन्स सिस्टम र राडारहरूमा लक्ष्य गरेर हमला गरिएको र लाहोरको एयर डिफेन्स सिस्टम पूर्णतः नष्ट भएको विश्वसनीय जानकारी प्राप्त भएको बताएको छ।
२. पाकिस्तानका ५० भन्दा बढी ड्रोन र मिसाइल बिफल
भारतले पाकिस्तानबाट हानिएका ५० भन्दा बढी मिसाइल र ड्रोन बिफल पारिएको दाबी गरेको छ। रातभरि पाकिस्तानले जम्मू, पठानकोट, उधमपुर, श्रीनगर, अमृतसर, चण्डीगढ, लुधियाना, भटिण्डा, जैसलमेर र भुजलगायत १५ सहरमा ५० भन्दा बढी ड्रोन र मिसाइल हमला गर्ने प्रयास गरेको र भारतीय एस-400 रक्षा प्रणालीले सबै हमलालाई बिफल पारेको दाबी गरेको छ। ती आक्रमणबाट कुनै क्षति नभएको भारतीय सेनाले दाबी गरेको छ।
३. आइपिएलको खेल रद्द
पाकिस्तान र भारतबीच ड्रोन प्रहार भएपछि गएराति पन्जाब किंग्स र दिल्ली क्यापिटल्सबीचको खल रद्द गरिएको छ। धर्मशालामा खेल भइरहँदा सुरक्षा निकायहरूले खेल स्थानमा खतरा देखाएपछि मैदानका सबै फ्लडलाइट निभाएर खेल रद्द गरिएको थियो। पहिले ब्याटिङ गरिरहेको पञ्जाबले १०.१ ओभरमा १ विकेटको क्षतिमा १२२ रन बनाएको थियो।
४. विमानस्थल बन्द
भारतले २४ वटा आन्तरिक र अन्तर्राष्ट्रिय विमानस्थल बन्द गरेको छ। विशेषगरी उत्तरी र पश्चिमी भूभागमा रहेका विमानस्थलहरू मे १० सम्म बन्द गर्ने निर्णय भएको भारतको नागरिक उड्डयन विभागले जनाएको छ।
पाकिस्तानले पनि लाहोर लगायत विभिन्न स्थानमा आन्तरिक उडान हुने विमानस्थलहरूमा अस्थायी रूपमा उडान बन्द गरेको बताइएको छ।
५. पुंछ र उरीमा भीषण बमबारी
पाकिस्तानी सेनाले जम्मू-कश्मिर पुंछ र उरीमा भीषण बमबारी गरेको छ।
उरीको जिंगल क्षेत्रमा राति ९ बजे पाकिस्तानी आक्रमणबाट १० वटा घरहरुमा क्षति पुगेको हिन्दुस्तान टाइम्सले उल्लेख गरेको छ।
पुंछमा १२ नागरिक र एक सेनाको मृत्यु भएको दाबी गरिएको छ। उरीमा पनि तीन जनाको मृत्यु भएको भारतको विदेश मन्त्रालयका सचिव विक्रम मिश्रीले बताएका छन्। त्यहाँ सिख समुदायलाई लक्ष्य गरेर आक्रमण भएको उनले बताएका छन्। त्यस्तै रजौरी, चौकीबाल र कुपवारा क्षेत्रमा पनि बमबारी भएका छन्।
५. विद्यालय बन्द
भारतका जम्मू-कश्मिर र पञ्जाबमा तीन दिन विद्यालय, क्याम्पस र अन्य शैक्षिक संस्थाहरू बन्द गर्ने निर्णय भएको छ। बिदामा बसेका प्रहरी कर्मचारीहरुको बिदा रद्द गरी काममा बोलाइएको भारतीय सञ्चारमाध्यमहरूले जनाएका छन्।
६.अन्तर्राष्ट्रिय सरोकार
अमेरिकी उपराष्ट्रपति जेडी भान्सले भारत-पाकिस्तानबीचको तनाव आफूहरुको मामिलाको विषय नरहेको बताएका छन्। उनले दुई देशबीचको 'युद्ध'मा अमेरिका संलग्न नहुने पनि बताएका छन्। यद्यपि कुटनीतिक तवरबाट समस्या समाधनको प्रयत्न भने उनले बताएका छन्।
