नेकपा (एकीकृत समाजवादी) का महासचिव घनश्याम भूसालले गणतन्त्रको नेतृत्व जुवाडेजस्तो भएको टिप्पणी गरेका छन्। पार्टीको पोखरा महानगरपालिकाको प्रथम नगर अधिवेशनलाई सम्बोधन गर्दै महासचिव भूसालले गणतन्त्रका नेतृत्वलाई जुवाडे समूहको संज्ञा दिएका हुन्।
‘आज गणतन्त्रको, खासगरी नेतृत्वका तहमा हेर्नुहुन्छ भने यी जुवाडेजस्ता भए, गणतन्त्रको नेतृत्व वास्तवमा जुवाडेहरूको एउटा समुदायजस्तो भयो,’ उनले भने, ‘आज एउटाले जित्यो, चौका.. छक्का हान्यो.., उसले दुनियाँसँग गफ गर्दै, दुनियाँलाई हेप्दै, मनपरी बोल्दै हिँडेको छ।’
गणतन्त्रको जुवामा हार्ने चाहिँ रूँदै, कराउँदै हिँडेको भन्दै भूसालले टिप्पणी गरे।
‘बलिन्द्रधारा आँसु चुहाउँदै मलाई सत्ताबाट निकाले, सत्तामा जान दिएनन् भन्दै त्यही सत्ताका लागि रूँदैछ,’ उनले भने।
सत्ताबाट हटेकोले गणतन्त्रको संस्थागत विकासका लागि जिम्मेवारी महसुस नगरेको उनको भनाइ छ।
‘सत्तामा पुगेको त यस्तो दम्भी र घमण्डी भएको छ कि, यो राजनीतिक नेतृत्वको कुरा गर्ने हो भने हारेका र जितेका जुवाडेहरूको यस्तो समूहजस्तो भएको छ,’ उनले भने।
हिजो गणतन्त्र आउँदा जसरी रम्ने, प्रफुल्ल हुने अवस्था थियो, त्यो अवस्था आज नभएकाले यसलाई गम्भीर समीक्षा गर्नुपर्ने उनले बताए।
‘फेरि हामीमाथि अर्को जिम्मेवारी छ। गणतन्त्रको यो व्यवस्थामा, खासगरी राजनीतिक पार्टीका हिसाबले, नेतृत्वका हिसाबले कहाँ चुक्यौं। हामीले एउटा बाटो पत्ता लगाउनुपर्नेछ। त्यो बाटोमा हिँडेर आजको यो उकुसमुकुसलाई चिर्नुपर्नेछ। मुलुकलाई साँच्चिकै गणतान्त्रिक, हाम्रो संविधानमा लेखेका ती अधिकार साँच्चिकै कार्यान्वयन गर्न सक्यौं भने आगामी १०–२० वर्षमा अझ राम्रो मुलुक बनाउन सक्छौं,’ उनले भने।
