युक्रेनी राष्ट्रपति भोलोदिमिर जेलेन्स्कीले सोमबार अमेरिकी राष्ट्रपति डोनाल्ड ट्रम्पसँग भेटवार्ता गर्दैछन्।
जेलेन्स्कीले ह्वाइट हाउसमा ट्रम्पसँग भेटवार्ता गर्न लागेका हुन्।
युक्रेनमा युद्धविरामबारे ट्रम्पले शनिबार रूसी राष्ट्रपति भ्लादिमिर पुटिनसँग वार्ता गरेका थिए।
तीन घन्टासम्म चलेको वार्तामा के कुराकानी भयो, सम्झौता कसरी गर्ने भन्ने विषयमा भएको छलफलबारे ट्रम्पले जेलेन्स्कीलाई जानकारी गराउन लागेका हुन्।
ह्वाइट हाउसमा ट्रम्पसँगको भेटमा जेलेन्स्कीले तितो अनुभव लिइसकेका छन्। गत फेब्रुअरीमा खनिज सम्झौताका लागि ह्वाइट हाउस पुगेका जेलेन्स्की राष्ट्रपति ट्रम्प र उनका उपराष्ट्रपति जेडी भान्सबीच भनाभन भएको थियो।
त्यसयता जेलेन्स्कीले पटकपटक भेटवार्ता गर्न खोजे पनि ट्रम्पले उनीसँग औपचारिक रूपमा लामो भेट गरेका छैनन्।
ह्वाइट हाउसमा चर्काचर्की भएको दुई महिनापछि ट्रम्प र जेलेन्स्कीबीच इटालीको रोममा १५ मिनेट एक्लाएक्लै भेटवार्ता भएको थियो।
त्यतिबेला क्याथोलिक चर्चका तत्कालीन प्रमुख पोप फ्रान्सिसको अन्त्येष्टिमा सहभागी हुन ट्रम्प रोम पुगेका थिए। त्यहीँ पुगेका जेलेन्स्कीसँग उनले १५ मिनेट कुराकानी गरेका थिए।
त्यसयता ट्रम्प र जेलेन्स्कीबीच प्रत्यक्ष भेटवार्ता भएको छैन।
सोमबारको भेटवार्ता सकारात्मक भए ट्रम्प, पुटिन र जेलेन्स्कीबीचको त्रिपक्षीय वार्ता तय हुनेछ।
आजको वार्ता सफल भए अर्को साताभित्रै त्रिपक्षीय भेटवार्ताको चाँजोपाँजो मिलाउने तयारी रहेको अमेरिकी अधिकारीहरूले बताएका छन्।
यसपालि फेब्रुअरीको भेटवार्ताजस्तो नहोस् भन्नका लागि जेलेन्स्कीसँगै युरोपेली नेताहरू पनि ह्वाइट हाउसको भेटवार्तामा सहभागी हुने बताइएको छ।
बेलायती प्रधानमन्त्री केअर स्टार्मर, जर्मनीका चान्स्लर फ्रेडरिक मर्ज, फ्रान्सका राष्ट्रपति इमानुएल म्याक्रों, इटालीका प्रधानमन्त्री जर्जिया मेलोनी, युरोपेली संघका प्रमुख उर्सुला भोन देर लेयन, फिनल्याण्डका राष्ट्रपति अलेक्जेन्डर स्टब र नेटोका महासचिव मार्क रुट्टे पनि ह्वाइट हाउस जाने अमेरिकी मिडिया सिएनएनले लेखेको छ।
यद्यपि उनीहरू पुटिनलाई धम्कीबाट जोगाउन ह्वाइट हाउस आउन लागेको होइनन् भनेर उपराष्ट्रपति भान्सले बताएका छन्।
'जेलेन्स्कीलाई दबाबमा पारिने वा उनीमाथि हाबी हुने अवस्थाबाट बचाउन युरोपेली नेताहरू आएका हुन् भन्ने विचार गलत हो,' भान्सले भनेका छन्।
फ्रान्सका राष्ट्रपति म्याक्रोंले भविष्यमा सम्भावित द्वन्द्व रोक्नका लागि रूसप्रति कडा रहन जरूरी रहेको बताएका छन्। र युरोप त्यसका लागि सक्षम रहेको पनि उनले बताएका छन्।
'यदि हामी आज रूससँग कमजोर छौं भने, हामी भोलिको द्वन्द्वको तयारी गरिरहेका छौं,' उनले भने।
त्यसकारण युरोप नयाँ कुटनीतिक चरणमा प्रवेश गर्नुपर्ने उनले बताए।
'हामीले युरोपेली हितहरूको रक्षा गर्नुपर्छ। हामी युक्रेनको रक्षा गर्न र आफ्नै रक्षा गर्न जाँदैछौँ,' उनले भने, 'हामी डरलाग्दो बन्नैपर्छ। डर लाग्दो बन्नका लागि हामी बलियो हुनुपर्छ।'
उनले युरोप युक्रेनसँग सम्बन्धित सुरक्षा ग्यारेन्टीको जिम्मेवारी लिन तयार रहेको पनि बताए। तर तेस्रो पक्षको मध्यस्थतामा हुने वार्तामार्फत युक्रेनलाई भूमि त्याग गर्न बाध्य पार्न नमिल्ने उनले बताएका छन्।
(विभिन्न अन्तर्राष्ट्रिय सञ्चारमाध्यमहरूको सहयोगमा तयार पारिएको)
-1746009348.jpg)
