एक वर्ष पहिले ऋण तिर्न भन्दै विदेश गएका एक जना वडाध्यक्ष स्वदेश फर्किएका छन्।
दाङको राप्ती गाउँपालिका–८ का वडाध्यक्ष चन्द्रबहादुर गुरूङ एक साताअघि बेलायतबाट फर्किएका हुन्।
अघिल्लो साउन १७ गतेदेखि लागू हुने गरी एक जना वडा सदस्यलाई कार्यवाहक दिएर उनी रोजगारीको खोजीमा बेलायत गएका थिए।
अघिल्लो साउन २० गते बेलायतका लागि उडेका उनी एक वर्षभन्दा बढी समय बेलायत बसेर तिजमा स्वदेश फर्केका हुन्।
घर फर्किएपछि उनी बिहीबार वडा कार्यालयमा पुगेका थिए। त्यहाँ पुगेर उनले पहिले जस्तै सेवाग्राहीको काम गरेका थिए। शुक्रबारै उनी कार्यपालिका बैठक पनि पुगे।
उनी पुगेकै कारण कार्यपालिका बैठक नै स्थगित हुन पुग्यो। कतिपय कार्यपालिका सदस्यहरूले उनको उपस्थितिबारे फरक मत राखेका थिए।
‘यो त जनप्रतिनिधिको नैतिकता नै भएन, कहिले विदेश जाने कहिले आउने यस्तो मनपरी गर्न मिल्दैन भन्दै कतिपय कार्यपालिका सदस्यले विरोध जनाउनुभयो,’ एक जना कार्यपालिका सदस्यले भने, ‘त्यसपछि केही होहल्ला भयो र बैठक नै बस्न सक्ने अवस्था नरहेपछि कार्यपालिका नै स्थगित भयो।’
वडाध्यक्ष गुरूङ कार्यपलिका बैठकमा सहभागी भएपछि उनलाई कुरा राख्न समय दिइएको थियो।
उनको कुरा चित्तबुझ्दो नभएको भन्दै पालिका प्रवक्ता तथा वडा नम्ब २ का अध्यक्ष पहलवान चौधरी, वडा नम्बर ४ का अध्यक्ष वीरबहादुर चौधरी, वडा नम्बर ६ का अध्यक्ष दीपककुमार चौधरी, कार्यपालिका सदस्य रणबहादुर पुजालीले फरक मत दर्ज गरेर बाहिरिएका थिए ।
फरक मत राख्नेहरूले जनताको मतबाट निर्वाचित व्यक्ति हुँ भन्दैमा मनोमानी गर्न नपाइने अडान लिएका थिए।
‘हामी पनि निर्वाचित भइसकेपछि विदेश गएर पैसा कमाएर २०८४ को निर्वाचनको समयमा आउन सक्थ्यौं नि! जनताको सेवा गर्छु भनेरै मत लिएको होइन? जनतामाथि विश्वास घात गर्ने, धोका दिने र फेरि फर्केर पूर्ववत् रूपमा वडाध्यक्षको जिम्मेवारी पाउनुपर्छ भन्नुलाई सही मान्न सकिँदैन,’ ती कार्यपालिका सदस्यले भने।
राप्ती गाउँपालिकाका अध्यक्ष प्रकाश विष्टले कार्यपालिकामा असहज अवस्था उत्पन्न भएपछि बैठक स्थगित गर्नु परेको बताए।
‘कर्मचारी भएको भए जागिर जान्थ्यो। अहिलेका जनप्रतिनिधि हामी पनि कर्मचारी जस्तै त छौं,’ अध्यक्ष विष्टले भने, ‘एक प्रकारले भन्ने हो भने जनताले तिरेको करबाटै राज्यबाट सेवा–सुविधा लिइरहेका छौं भने हामी पनि अनुशासनमा बस्नुपर्छ,’ उनले भने।
वडाध्यक्ष चन्द्रबहादुर गुरूङ गत वर्ष कमाउनका लागि विदेश जाँदा मार्ग प्रशस्त नगरी (पदबाट राजीनामा) नदिई गएको र एक वर्षपछि फर्किएर आउँदा सोही पदमा कार्यरत हुन चाहेपछि धेरैले राजनीतिक इमान र नैतिकताको प्रश्न उठाएर विरोध जनाएको गाउँपालिका अध्यक्ष विष्टले बताए।
२०७९ को चुनावमा वडाध्यक्ष गुरूङ नेकपा (एमाले) बाट उम्मेदवार विजयी भएका थिए। निर्वाचित हुनुभन्दा पहिले उनी सोही वडाको कार्यालय सहयोगीको रूपमा कार्यरत थिए।
यो पनि: ऋण तिर्छु भन्दै बेलायत गए राप्तीका वडाध्यक्ष
-1746009348.jpg)
