प्रधानमन्त्री सुशीला कार्कीलाई गृहमन्त्री माग गर्न धरान उपमहानगरपालिकाका मेयर हर्क साम्पाङ प्रधानमन्त्री निवास बालुवाटार पुगेको खुलेको छ।
साम्पाङ आइतबार बिहानै ७ बजेतिर प्रधानमन्त्री निवास बालुवाटार पुगेका थिए। उनले प्रधानमन्त्री कार्कीसँग भेट्न अनुमति मागेका थिए।
बालुवाटारका सुरक्षाकर्मीहरूले साम्पाङलाई सुरूमा भित्र प्रवेश गर्न दिएका थिएनन्। लामो समयसम्म पनि पर्खेर साम्पाङले भेट्न अनुरोध गरेपछि सुरक्षाकर्मीले परिसरभित्र प्रवेश दिएको बालुवाटार स्रोतले बतायो।
उनी बिहान ७ बजेदेखि १ बजेसम्म बालुवाटारमै कुरेर बसेका थिए। अहिले प्रधानमन्त्री कार्कीले समय नलिएका व्यक्तिहरूसँग नभेट्ने बताएकी छन्।
त्यसो हुँदा साम्पाङ भेट्न नपाइ फर्किएका छन्।
त्यसैगरी, नेपाल प्रहरीका पूर्वआइजिपी सर्वेन्द्र खनाल पनि शनिबार साँझ प्रधानमन्त्री निवास पुगेको बालुवाटार स्रोतले बताएको छ। उनले प्रधानमन्त्रीसँग किन भेट्न खोजेका थिए भन्ने खुलेको छैन।
उनले सुरक्षाकर्मीसँग 'म पूर्वआइजिपी हुँ, भेट्न नदिने!' भनेर असन्तुष्टि पोखेका थिए।
उनी आएको जानकारी प्रधानमन्त्री कार्कीलाई सुरक्षाकर्मीले गराएपछि कार्कीले भनेकी थिइन्, 'अपोइन्टमेन्ट नलिएको मान्छेसँग भेट्दिनँ।'
पूर्वआइजिपी खनालले भने सेतोपाटीसँग कुरा गर्दै आफूले सुरक्षाकर्मीकहाँ पुगेर आफूलाई भित्र जान दिन नभनेको दाबी गरे।
'प्रधानमन्त्रीका श्रीमान दुर्गा सुवेदीसँग मेरो राम्रो चिनजान छ। उहाँलाई प्रधानमन्त्रीसँग भेट मिलाइदिन अनुरोध चाहिँ गरेको हुँ,' खनालले भने।
धरानका मेयर हर्क साम्पाङले यसअघि आफूलाई प्रधानमन्त्री बनाउनुपर्ने पनि भने थिए। युवाहरूको समर्थन आफूलाई भएको बताउँदै उनी जंगी अड्डासमेत पुगेका थिए।
-1746009348.jpg)
