कर्णाली प्रदेशमा हालैको जेनजी आन्दोलनका क्रममा अधिकांश जिल्लामा शान्त वातावरण कायम रहँदा प्रदेश राजधानी सुर्खेतमा भने सबभन्दा ठूलो क्षति पुगेको छ।
रूकुम पश्चिमका प्रमुख जिल्ला अधिकारी (प्रजिअ) दिनेशप्रसाद थानीका अनुसार बाफिकोट गाउँपालिकामा प्रदर्शनकारीहरूले तत्कालीन प्रधानमन्त्री केपी शर्मा ओली र राष्ट्रपति रामचन्द्र पौडेलको तस्बिर बाहिरै जलाए पनि कार्यालयभित्र ढुंगामुढा, तोडफोड वा आगजनी हुन पाएन।
तर भदौ २४ गते जिल्ला कारागारमा १५८ कैदीमध्ये ८८ जना भागे। तीमध्ये ६१ जनालाई सोही दिन पक्राउ गरिएको र २७ जना अझै फरार रहेको उनले जानकारी दिए।
सल्यानमा प्रमुख बजार खलंगा र श्रीनगरमा सामान्य प्रदर्शन भए पनि तोडफोड वा आगजनी हुन पाएन। प्रजिअ नेत्रप्रसाद अधिकारीका अनुसार प्रहरी, राजनीतिक दल र अभिभावकबीचको समन्वयले स्थिति नियन्त्रणमा रह्यो।
प्रमुख जिल्ला अधिकारी नेत्रप्रसाद अधिकारीले जिल्लामा एउटै पनि हिंसात्मक गतिविधि हुन नपाएको बताए।
‘मलाई सल्यान अत्यन्तै संयमित जिल्ला लाग्यो,’ उनले भने, ‘यहाँको समाज र अभिभावक आफै कुनै पनि हिंसात्मक गतिविधिका विरूद्ध सचेत भएको पाएँ।’
जाजरकोटमा भने कुशे गाउँपालिका–४ को वडा कार्यालयमा मात्र ढुंगामुढा र आगजनी भएको प्रजिअ राजु पौडेलले बताए। त्यहाँका कैदीहरूले कारागारको पर्खाल भत्काएर भाग्ने प्रयास गरे पनि प्रहरी प्रशासनले रोक्न सफल भएको हो।
दैलेख, कालिकोट, हुम्ला, मुगु र डोल्पामा सामान्य प्रदर्शन भए पनि कुनै सरकारी वा निजी सम्पत्तिमा क्षति पुगेन। स्थानीय प्रशासन, दल र समाजबीचको सहकार्यले सम्भावित हिंसात्मक गतिविधि रोकिएको प्रजिअहरूले जनाएका छन्।
तर जुम्लामा भने नेपाली कांग्रेस र नेकपा एमालेका पार्टी कार्यालय, चन्दननाथ नगरपालिकाको कार्यालय र जिल्ला प्रशासन कार्यालयमा तोडफोड भएको छ। नगरपालिकामा राखिएका छ वटा मोटरसाइकलमा आगजनी गरिएको छ भने करिब एक करोड बराबरको क्षति पुगेको अनुमान गरिएको छ।
कर्णाली प्रदेशका दश जिल्लामध्ये प्रदेशको राजधानी सुर्खेत हो। सुर्खेत उपत्यका डोल्पा, हुम्ला, जुम्लादेखि निकै टाढा र दक्षिणको भूभाग हो। सबैभन्दा बढी आक्रोश पनि यही जिल्लामा जेनजीको नाममा पोखिएको छ। त्यही भएर सबैभन्दा बढी क्षति सुर्खेतमै भएको छ।
प्रजिअ जगदिश्वर उपाध्यायका अनुसार २८ सरकारी संरचना, आठ निजी सम्पत्ति, पाँच पार्टी कार्यालय र तीन संघ–संस्थासहित ४४ संरचनामा तोडफोड र आगजनी भएको छ। नापी कार्यालय, प्रदेश लेखा नियन्त्रकको कार्यालय, कर्णाली प्रदेशसभा भवन र मुख्यमन्त्रीको निवाससहितका संरचनामा ठूलो क्षति पुगेको छ। नेपाली कांग्रेस उपसभापति पूर्णबहादुर खड्काको निजी घर, मुख्यमन्त्री यामलाल कँडेल र अन्य नेताका निवासहरूमा पनि तोडफोड र आगजनी भएको छ।
कुलमा कर्णालीका १० जिल्लामध्ये अधिकांशमा शान्ति कायम भए पनि सुर्खेतमा मात्रै ठूलो क्षति भएको हो। प्रदेशभर करिब ६० संरचना र ४५ सवारी साधनमा तोडफोड तथा आगजनी भएको प्रदेश प्रशासनले जनाएको छ।
-1756794700.JPG)
-1746009348.jpg)
