जनमत पार्टीले मधेसका मुख्यमन्त्री सतिशकुमार सिंहलाई कारबाही गर्ने तयारी सुरू गरेको छ।
जनमत पार्टीले मुख्यमन्त्री पदबाट राजीनामा दिन उनलई निर्देशन दिएको थियो। उनले नमानेपछि कारबाही गर्न लागिएको हो।
पार्टीको अनुशासन समितिले बिहीबार पत्र मार्फत् उनीसँग स्पष्टीकरण मागेको छ।
केन्द्रीय उपाध्यक्ष एवं अनुशासन समितिका संयोजक नरेन्द्रप्रसाद चौधरीले तीन दिनभित्र स्पष्टीकरण पेस गर्न भन्दै पत्र पठाएका हुन्।
आफ्नै नेतृत्वको सरकारलाई समर्थन फिर्ता लिएको र मुख्यमन्त्री र मन्त्री समेत फिर्ता बोलाएको भन्दै जनमतले प्रदेश सभालाई जानकारी गराइसकेको छ।
उद्योग वाणिज्य तथा पर्यटन मन्त्री रहेका बसन्त कुशवाहा र वनमन्त्री सञ्जय कुमार यादवले पदबाट राजीनामा दिइसकेका छन्। तर मुख्यमन्त्री सिंह भने ‘सदन फेस’ गर्ने मनस्थितिमा छन्।
पत्रमा ‘मुख्यमन्त्री सहितका आफ्नो पार्टीका मन्त्रीहरूलाई फिर्ता बोलाउने निर्णय गरी मुख्यमन्त्री सहित मन्त्रीहरूलाई मधेस प्रदेश सरकारबाट राजीनामा दिन निर्देशन दिएको र तपाईं स्वयं फेसबुक मार्फतबाट राजीनामा दिएकोमा सोको समेत अवहेलना गर्दै तपाईंले मुख्यमन्त्री पदबाट राजीनामा नदिएको, अरू पार्टीहरूसँग साँठगाँठ गरी पार्टीको हित विपरीतका गतिविधिमा संलग्न भएको, पार्टीमा आघात हुने गरी कार्य गरेको, पार्टीको छविलाई आँच पुर्याएको’ आरोप लगाइएको छ।
‘पार्टीको संसदीय दलको तर्फबाट प्रदेश सभा सदस्य तथा पार्टीको साधारण सदस्य समेत नरहने गरी किन कारबाही नहुनु पर्ने हो ३ दिन भित्रमा स्पष्टीकरण पेस गर्नु हुन अनुरोध छ,’ संयोजक चौधरीले पठाएको पत्रमा लेखिएको छ।
-1758107792.jpg)
-1746513231.jpg)
-1746009348.jpg)
