नेकपा (एमाले) का उपमहासचिव प्रदीप ज्ञवालीले अहिले नेतृत्वमाथि प्रहार गर्ने भाष्य निर्माण रोकिनुपर्ने बताएका छन्।
नुवाकोटमा शुक्रबार एमाले जिल्ला कमिटीको विस्तारित बैठकलाई सम्बोधन गर्दै उनले विगतका कमजोरी सच्याउँदै पार्टीलाई नयाँ ढंगले अघि बढाउने बताए।
‘भर्खरै पार्टी अध्यक्ष केपी शर्मा ओली सुरक्षाको घेराबाट बाहिरिनु भएको छ। नेतृत्वमाथि विभिन्न कोणबाट प्रहार गर्ने नियोजित प्रयास भइरहेको छ। यस्तो बहकाउमा पर्नुहुँदैन,’ उनले भने, ‘हामी गम्भीर समीक्षा गरेर अघि बढ्छौं, अहिले नेतृत्वमाथि प्रहार गर्ने भाष्य निर्माण रोकिनुपर्छ।’
उनले संविधाननेपाली जनताको सात दशक लामो संघर्षको दस्ताबेज र राष्ट्रिय एकताको सूत्रधार भएको बताए।
संविधान बनाउँदा आन्तरिक तथा बाह्य दबाब रहे पनि सार्वभौम जनताका प्रतिनिधिमार्फत जारी गर्न सफल भएको सम्झँदै उनले भूकम्प र नाकाबन्दी जस्ता चुनौतीपछि पनि नेपाली जनताले संविधानलाई आत्मसात गरेको उल्लेख गरे।
‘यो संविधान धेरै प्रगतिशील छ। जारी हुदा तत्कालीन शक्ति सन्तुलनको दस्तावेज पनि हो। यसलाई समयानुकूल परिमार्जन र संशोधन गर्न सकिन्छ,’ ज्ञवालीले भने, ‘तर अहिले संविधान नै संकटमा परेको छ। संविधानले नचिनेको सरकारले चुनाव गर्ने भनेको छ, संविधान जोगाउन चुनाव अपरिहार्य हुन्छ।’
ज्ञवालीले भदौ २३ र २४ गतेका घटनामा सुरक्षा निकायको भूमिका गम्भीर रूपमा समीक्षा र छानबिन गर्नुपर्ने बताए।
‘सैनिक मुख्यालय नजिकै सर्वोच्च अदालत, सिंहदरबार र राष्ट्रपति कार्यालय जस्ता महत्त्वपूर्ण निकाय सुरक्षित राख्न नसक्ने सुरक्षा संयन्त्रले स्वतन्त्र र निष्पक्ष निर्वाचन सुनिश्चित गर्न सक्छ भन्नेमा संशय पैदा भएको छ,’ उनले भने।
पार्टी नेतृत्व र कार्यकर्ताबीचको सम्बन्धबारे पनि उनले आत्मालोचनात्मक टिप्पणी गरेका थिए। ‘हाम्रा कमजोरी हटाएर अघि बढ्छौं। कतिपय अपेक्षा पूरा गर्न नसकिएका वा गल्ती भएका हुन सक्छन्। तर अब केन्द्रीय कमिटी लगायतका फोरममा छलफल गरेर नयाँ ढंगले अघि बढ्छौं,’ उनले भने।
-1758107792.jpg)
-1746513231.jpg)
-1746009348.jpg)
