जनता समाजवादी पार्टी नेपालले संविधानलाई संशोधन, परिमार्जन तथा पुनर्लेखन नगरी जेनजीका माग सम्बोधन गर्न नसकिने बताएको छ।
असोज ५ गते बसेको केन्द्रीय कार्यकारिणी समितिको निर्णय सोमबार सार्वजनिक गर्दै केवल झूटा आश्वासनको भरमा मात्र जेन जीले उठाएका माग र मुद्दाहरूलाई सम्बोधन गर्न नसकिने बताएको हो।
त्यसको लागि प्रतिनिधि सभा संसदलाई कायमै राखिनु पर्ने जसपाको मान्यता छ। प्रतिनिधि सभाको विघटन पनि संविधान अनुकूल गरेको नदेखिएको जसपाले बताएको छ।
‘मुलुकको वर्तमान संविधानलाई संशोधन, परिमार्जन तथा पुनर्लेखन नगरी क्रान्तिकारी परिवर्तन र रुपान्तरण नै नगरी केवल झूटा आश्वासनको भरमा मात्र जेन जीले उठाएका माग र मुद्दाहरूलाई सम्बोधन गर्न सक्ने अवस्था नै छैन। शासकीय स्वरूप, निर्वाचन प्रणाली, न्याय प्रणाली, संवैधानिक अंगहरू, प्रादेशिक संरचना, पहिचान, समावेशिता र सामाजिक न्यायसँग सम्बन्धित मुद्दाहरूलाई सम्बोधन गर्न संविधान संशोधन वा पुनर्लेखन नगरी हुन्न। त्यसको लागि प्रतिनिधि सभा संसदलाई कायमै राखिनु पर्दथ्यो। प्रतिनिधि सभाको विघटन पनि संविधान अनुकूल गरिएको देखिँदैन। यथास्थितिमा गरिने निर्वाचनले परिवर्तनकारी शक्तिहरूले उठाउँदै आएका मुद्दाहरु पूर्ण रूपले हल हुन सक्दैन तर पनि नयाँ प्रतिनिधि सभाले स्थान ओगट्नेछ। मुलुक पुनः यथास्थितिमा फर्किनेछ। प्रतिगमनकारी शक्तिहरु परास्त हुने छन्,’ जसपाले भनेको छ।
भदौ २३ गतेअगावै सरकारले जेन–जीहरूको न्यायोचित माग र मुद्दाहरूलाई सम्बोधन गरी तत्काल समस्या समाधान गर्नुपर्ने पनि जसपाले बताएको छ। तर सरकारले सत्ता र शक्तिको दम्भमा दमनकारी नीति लिई राज्य आतंक फैलाई विद्रोहमा लागेकाहरूमाथि दमन गर्ने कार्य गरेको जसपाको ठहर छ।
‘दर्जनौं युवाहरूको हत्या र हजारौं युवाहरूलाई घाइते बनायो। जसले गर्दा परिस्थिति झन् बिग्रन गई भदौ २४ गते सम्ममा ठूलो संख्यामा मुलुकले धन–जनको क्षति बेहोर्नु पर्यो,’ जसपाले भनेको छ।
सरकार, सेना, प्रहरी र प्रशासनले चाहेको भए मुलुकलाई ठूलो जन–धनको क्षति हुनबाट जोगाउन सक्ने जसपाको बुझाइ छ।
‘तर जोगाउने प्रयास सम्म किन गरिएन? रहस्यमय रहेको छ। नेपालीलाई रोजगारी प्रदान गर्दै आएका केही मुलुकहरूले वर्किङ भिसा, टुरिष्ट भिसा, भिजिट भिसा रद्द गरेका छन्। यसको जिम्मेवार केपी शर्मा ओली नेतृत्वको सरकार नै हो। मुलुकलाई नै क्षति पुर्याउने दोषीहरूको छानबिन गरी कानुन बमोजिम कारबाही गरी पीडिततलाई क्षतिपूर्ति सरकारले दिने व्यवस्था गर्नु पर्छ,’ जसपाले भनेको छ।
-1746009348.jpg)
