फागुन २१ गते तोकिएको प्रतिनिधि सभा निर्वाचनमा वाचा–पत्र तयार गर्न राष्ट्रिय स्वतन्त्र पार्टी (रास्वपा) ले कार्यदल गठन गरेको छ।
बुधबार सकिएको केन्द्रीय समिति बैठकले उपसभापति स्वर्णिम वाग्लेको संयोजकत्वमा ७ सदस्यीय वाचापत्र लेखन समिति गठन गर्ने निर्णय गरेको हो।
'फागुन २१ गते हुन गइरहेको निर्वाचनका लागि रास्वपाको वाचापत्र तयार गर्न पार्टी उपसभापति डा. स्वर्णिम वाग्लेको संयोजकत्वमा ७ सदस्यीय वाचा–पत्र लेखन समिति गठन गर्ने निर्णय भएको छ,' प्रवक्ता मनिष झाले भने।
यसैबीच रास्वपाले केन्द्रीय विस्तारित बैठक बोलाएको छ। आगामी कात्तिक १४ र १५ गते विस्तारित बैठक बस्ने र उक्त विस्तारित बैठकमा पार्टीको प्रथम राष्ट्रिय महाधिवेशनका विषयमा समेत छलफल गर्ने निर्णय भएको प्रवक्ता झाले बताए।
बैठकले भदौ २३ र २४ गते भएको आन्दोलनमा राज्य पक्षबाट भएको दमन र हिंसाको छानबिन प्रतिवेदन नआएसम्म तत्कालीन सरकारका प्रधानमन्त्री, गृहमन्त्री र सञ्चार मन्त्रीलाई राजनीतिक क्रियाकलापमा सहभागी हुन बन्देज लगाउन नेपाल सरकारलाई ध्यानाकर्षण गराउनेबारे पनि निर्णय गरेको छ।
त्यस्तै २०४६ सालदेखिको उच्च सार्वजनिक ओहदामा रहेका व्यक्तिहरूको सम्पत्ति छानबिन गर्न सरकारलाई दबाब दिने निर्णय गरेको झाले बताए।
-1746009348.jpg)
