मधेश प्रदेशमा नयाँ सरकार गठनको प्रक्रिया सुरू भएको छ। मुख्यमन्त्री सतिशकुमार सिंहले राजीनामा दिए लगत्तै नयाँ सरकार गठनको प्रक्रिया सुरू भएको हो।
मुख्यमन्त्री सतिशकुमार सिंहले मंगलबार दिएको राजीनामा स्वीकृत गर्दै प्रदेश प्रमुख सुमित्रा सुवेदीले नयाँ सरकार गठनका लागि आह्वान गरेकी छन्।
मंगलबार प्रदेश प्रमुख कार्यालय मधेश प्रदेशका निमित्त सचिव शत्रुधन यादवले विज्ञप्ति जारी गर्दै प्रदेश प्रमुखले भोलि नै नयाँ सरकार गठनका लागि दाबी पेश गर्न आह्वान गरेको बताए।
उनका अनुसार नयाँ सरकार गठनका लागि भोलि बुधबार अपरान्ह ४ बजेसम्म दुई वा दुई भन्दा बढी दलको बहुमत पुर्याएर दाबी पेश गर्न आह्वान गरिएको छ।
सदन फेस गर्ने बताउँदै विश्वासको मत लिन गएका मुख्यमन्त्री सिंहले विश्वासको मत नलिई राजीनामा दिएका थिए। उनले संविधानको धारा १६९ उपधारा १ को 'क' अनुसार राजीनामा दिएका हुन्।
मधेश प्रदेश सभामा प्रतिनीधित्व गर्ने १० वटा दलमध्ये कुनैपनि राजनीतिक दलसँग एकल बहुमत छैन। तसर्थ प्रदेश प्रमुख सुमित्राले संविधानको धारा १६८ को उपधारा २ बमोजिम सरकार गठनका लागि आह्वान गरेकी छन्।
उक्त धारामा प्रदेश सभामा कुनैपनि दलको स्पष्ट बहुमत नरहेको अवस्थामा प्रदेश सभामा प्रतिनीधित्व गर्ने दुई वा दुई भन्दा बढी दलहरुको समर्थनमा बहुमत प्राप्त गर्न सक्ने प्रदेश सभाका सदस्यलाई प्रदेश प्रमुखले मुख्यमन्त्री नियुक्त गर्न सक्ने प्रावधान छ।
मधेश प्रदेश सभामा ६४ प्रत्यक्ष र ४३ समानुपातिक गरी १०७ सदस्यीय प्रदेश सभा सदस्य छन्।
नेकपा एमालेले २५, नेपाली कांग्रेसको २२, जनता समाजवादी पार्टी नेपालले १९, जनमत पार्टीले १३, लोकतान्त्रिक समाजवादी पार्टी र नेकपा माओवादी केन्द्रले ९/९, नेकपा एकीकृत समाजवादीले ७, नेपाल संघीय समाजवादी पार्टी, नागरिक उन्मुक्ति पार्टी र राष्ट्रिय प्रजातन्त्र पार्टीले १/१ सिट जितेका छन्।
एमालेबाट निर्वाचित प्रदेश सभा सदस्य रामचन्द्र मण्डल सभामुख भएका छन् भने दिपेन्द्रकुमार ठाकुर निलम्बनमा पर्दा एमालेसँग २३ सिट मात्रै छ।
अर्कातर्फ लोकतान्त्रिक समाजवादी पार्टीका अभिराम शर्मा पनि निलम्बनमा छन्।
मुख्यमन्त्री बन्नका लागि ५४ जना प्रदेश सभा सदस्यको समर्थन चाहिन्छ।
तर यसअघि नै नेपाली कांग्रेस, नेकपा एमाले र जनमत पार्टीले मिलेर नयाँ सरकार बनाउने तयारी गरिसकेको छ।
प्रदेश प्रमुखले आव्हान नगर्दै तीन दलले नेपाली कांग्रेसका संसदीय दलका नेता कृष्णप्रसाद यादवलाई मुख्यमन्त्री बनाउने गरी दाबी पेस गरेका थिए।
प्रदेश सभामा प्रतिनिधित्व गर्ने चार ठूला दलमध्ये तीन दल एक ठाउँमा आउँदा उनीहरूसँग बहुमत सुनिश्चित छ।
राजनीतिक समीकरणमा कुनै फेरबदल नभएको अवस्थामा यादव नै मुख्यमन्त्री हुने सम्भावना बलियो छ।
एमालेका २३, कांग्रेसका २२ र जनमतका १३ गरी ५८ जना प्रदेशसभा सदस्यको समर्थन रहेको उनीहरूको दाबी छ।
1635339834.jpeg)
-1756794700.JPG)
-1746009348.jpg)
