अमेरिकी राष्ट्रपति डोनाल्ड ट्रम्प र रूसी राष्ट्रपति भ्लादिमिर पुटिनबीच पुनः भेटवार्ता हुने तय भएको छ।
बिहीबार ट्रम्प र पुटिनबीच टेलिफोन संवादपछि दुई राष्ट्रपतिबीच हंगेरीको राजधानीमा भेटवार्ता हुने तय भएको हो।
बिहीबार ह्वाइट हाउसमा पत्रकाहरूसँग कुराकानी गर्दै ट्रम्पले युक्रेन युद्ध अन्त्यका लागि छलफल गर्न पुटिनसँगको भेट बुडापेस्टमा हुने निश्चित भएको जानकारी दिए।
क्रेमलिनले पनि भेटवार्ता तय भएको पुष्टि गरेको छ।
अन्तर्राष्ट्रिय समाचार संस्था रोयटर्सका अनुसार भेट दुई साताभित्रै हुने तय भएको छ। यकिन मिति र समय भने तोकिइसकेको छैन।
ट्रम्प र पुटिनबीच यसअघि अमेरिकाको अलास्कामा छलफल भएको थियो। उक्त छलफलबाट युक्रेनमा सन् २०२२ देखि जारी युद्ध अन्त्यको ठोस सम्झौता नभए पनि छलफल जारी राख्ने सहमति भएको थियो।
त्यतिबेला पुटिनले अबको छलफल मस्कोमा हुने भनेर ट्रम्पलाई सुनाएका समेत थिए। तर उनीहरुबीच मस्कोमा नभई बुडापेस्टमा भेटवार्ता हुने भएको छ।
यो छलफलमा युक्रेनी राष्ट्रपति भोलोदिमिर जेलेन्स्की भने सहभागी नहुने रोयटर्सले जनाएको छ। अघिल्लो छलफलमा पनि पुटिनले जेलेन्स्कीलाई सहभागी गराउन अस्वीकार गरेका थिए।
बुडापेस्टमा सम्भावित ट्रम्प–पुटिन भेटले पनि विश्वको ध्यान तानेको छ। पुटिनमाथि केही मुलुकहरूले युद्ध अपराधको आरोप लगाएका कारण उनको यात्रा सीमित छ।
तर युक्रेन र हंगेरीबीच पछिल्लो समय सम्बन्ध चिसिएको छ। गत महिनामात्र जेलेन्स्कीले हंगेरीका ड्रोनहरू युक्रेनको आकाशमा प्रवेश गरेको आरोप लगाएका थिए। हंगेरीका प्रधानमन्त्री भिक्टर अर्बानले भने युक्रेनको स्वतन्त्रता नै प्रश्नवाचक भएको प्रतिक्रिया दिएका थिए।
ट्रम्प र पुटिनबीच हंगेरीमा भेट हुने भनेपछि प्रधानमन्त्री अर्बानले त्यसका लागि आफूहरू तयार रहेको बताएका छन्।
'अमेरिकी र रसियाली राष्ट्रपतिबीचको योजना गरिएको बैठक विश्वका शान्तिप्रेमी जनताका लागि राम्रो खबर हो। हामी तयार छौं,' उनले एक्समा लेखेका छन्।
ट्रम्पले युक्रेनी राष्ट्रपति जेलेन्स्कीसँग ह्वाइट हाउसमा वार्ता गर्नुअघि पुटिनसँग टेलिफोन संवाद गरेका थिए। जेलेन्स्की वाशिङ्टन पुगिसकेका छन्। उनले शुक्रबार ट्रम्पलाई भेट्ने तय छ।
जेलेन्स्कीले ट्रम्पसँग लामो दूरीमा मार हान्न सक्ने तोमहक मिसाइल माग्ने तयारी गरेको भनेर रोयटर्सले लेखेको छ। त्यसका लागि ट्रम्प पनि सकारात्मक छन्।
पुटिनले भने युक्रेनलाई तोमहक मिसाइल बेच्नुले अहिले भइरहेको शान्तिको वार्ताको वातावरण खलबलाउन सक्ने बताएका छन्।
ट्रम्पले पुटिनको त्यो भनाइलाई पत्रकार सम्मेलनमा समेत प्रस्तुत गरेका थिए।
'तोमहकजस्तो क्रुर मिसाइल युक्रेनलाई बेचोस् भन्ने पुटिन चाहन्छन् त? चाहँदैनन्,' ट्रम्पले पत्रकारहरूसँग भने।
उनले आफ्नो जीवन नै वार्ता र सम्झौतामा केन्द्रित रहेको पनि दाबी गरे। भर्खरै इसराइल र हमासबीच युद्धविराम सम्झौता गराएका ट्रम्पले युक्रेन युद्ध पनि चाँडै अन्त्य हुने विश्वास व्यक्त गरे।
'मेरो सम्पूर्ण जीवनमा सम्झौताहरू गरेको छु। मलाई लाग्छ कि हामी यसमा पनि सफल हुनेछौं,' उनले पत्रकारहरूसँग भने।
जेलेन्स्कीले भने तोमहक मिसाइलको नाम सुनेर पुटिनले फेरि शान्तिको कुरा गरेको आरोप लगाए।
' जति बेला हतियारको विषय आउँछ त्यतिबेला मस्को शान्तिको कुरा गर्छ,' जेलेन्स्कीले एक्समा लेखेका छन्।
1635339834.jpeg)
-1746009348.jpg)
