नेकपा एमाले सचिवालयको ५९ औं बैठकमा अध्यक्ष केपी शर्मा ओलीले नेपाली कांग्रेस पनि प्रतिनिधि सभा पुनः स्थापनाको मुद्दामा आइपुग्ने बताएका हुन्।
शनिबार भक्तपुरको गुण्डुस्थित आफ्नै निवासमा झन्डै पाँच घन्टा चलेको बैठकमा अध्यक्ष ओलीले केही 'प्रचारवाजी कांग्रेस' का कारण ऊ निर्णयमा पुग्न नसकेको सन्दर्भ राख्दै प्रतिनिधि सभा पुनः स्थापना अब एमालेको मात्रै एजेन्डा नहुने बताएका थिए।
एमालेको शनिबारको सचिवालय बैठकले प्रतिनिधि सभा पुनः स्थापनाका लागि जनपरिचालन गर्ने निर्णय गरेको छ। वडा तहदेखि पालिका हुँदै केन्द्र तहसम्म जनसभा राख्ने निर्णय गरेको छ।
एमाले उपमहासचिव प्रदीप ज्ञवालीका अनुसार एमालेले आगामी कात्तिक २२ गते ६ हजार ७४३ वडामै भेला गर्ने निर्णय गरेको छ। कात्तिक २५ गते पालिका तहमा प्रदर्शन हुनेछन्। २९ गते जिल्ला जनसभाको आयोजना गर्ने र काठमाडौंमा मंसिर ६ गते जनसभा गर्ने निर्णय गरिरहेको छ।
यी सबैको उद्देश्य प्रतिनिधि सभा पुनः स्थापनाका लागि दबाब सिर्जना गर्नु रहेको उपमहासचिव ज्ञवालीले बताए।
प्रतिनिधि सभा पुनः स्थापनाको पक्षमा एमाले एक्लैजस्तो देखिएको छ। विघटित प्रतिनिधि सभाका धेरै दल विशेषतः माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टीले चुनावमा जाने निर्णय गरिसकेका छन्। नेपाली कांग्रेसभित्र पनि चुनावमै जानुपर्छ भन्ने मत बलियो बन्दै गइरहेको छ।
तर सचिवालय बैठकमा अध्यक्ष ओलीले कांग्रेसको नेतृत्व तहसँग कुरा भइरहेको बताउँदै प्रतिनिधि सभा पुनः स्थापनाको मुद्दामा आइपुग्ने बताएको एक नेताले बताए।
'सुशीला कार्की नेतृत्वको सरकारले चुनाव गराउँदैन। चुनाव गराउने सामर्थ्य पनि छैन। त्यसैले प्रतिनिधि सभा पुनः स्थापनाको बाटो नै सजिलो विकल्प हो। वैधानिक बाटो पनि हो,' अध्यक्ष ओलीको भनाइ उद्धृत गर्दै एक सचिवालय सदस्यले भने, 'मैले कांग्रेससँग कुराकानी गरिराखेको छु। कांग्रेसभित्र पनि विवाद देखिएको छ। प्रचारवाजी कांग्रेस त्यसमा सहमत छैन। राजनीतिक कांग्रेस सहमत छ।'
प्रचारवाजी कांग्रेस भनेर महामन्त्री गगन थापा र विश्वप्रकाश शर्मालाई इंगित गरेका हुन्।
६ बुँदे प्रस्ताव गराए प्रवेश
सचिवालय बैठकमा अध्यक्ष ओलीले ६ बुँदेबारे पनि जानकारी गराएका थिए। उक्त ६ बुँदे केही दिनअघि भक्तपुर गुण्डुस्थित निवासमै भेट्न पुगेका पार्टी सम्बद्ध मानवअ धिकारवादी संगठन मानव अधिकार अलाइन्सका प्रतिनिधिमार्फत् बाहिरिएको थियो।
उक्त प्रस्तावमा प्रतिनिधि सभा पुनः स्थापना, जेनजी सहितको सर्वपक्षीय सरकारको प्रस्ताव थियो।
उक्त कुरा आफूले विकल्पको रूपमा अघि सारेको ओलीले बताएका थिए। आफूलाई भेट्न गुण्डु नै आइपुगेका जेनजीका केही प्रतिनिधिलाई उक्त ६ बुँदे प्रस्ताव गरेको पनि ओलीले बताएका थिए।
तर आफूलाई भेट्न जेनजीको कुन चाहिँ प्रतिनिधि आएका थिए भनेर ओलीले विस्तृतमा बताएनन्।
'प्रतिनिधि सभा पुनः स्थापनापछि के गर्ने भन्ने प्रश्न थियो। मैले ६ बुँदे प्रस्ताव गरेको छु। मलाई भेट्न यहाँ (गुण्डुस्थित निवास) मा केही जेनजीहरू आएका थिए। उनीहरूलाई ६ बुँदे कुरा राखेको हुँ। प्रतिनिधि सभा पुनः स्थापना भने पनि पहिलेकै संसदले काम गर्दैन। सडकको आन्दोलनलाई पनि समेट्न परिहाल्छ। उनीहरूलाई समेटेर लैजाने विकल्प अघि सार्दा मैले ६ बुँदे प्रस्ताव गरेको हुँ। उनीहरूसमेतको सहभागितामा सरकार बनाउने, संविधानका केही प्रावधान संशोधन गरेर चुनावमा जाने नै विकल्प अहिलेका लागि उत्तम हो,' ओलीले भनेका थिए।
'सदस्यताबारे विद्या भण्डारीसँग कुरा गर्छु'
शनिबारको सचिवालय बैठकमा सदस्यहरूले पूर्वराष्ट्रपति विद्या भण्डारीको सदस्यताबारे पुनः कुरा उठाएका थिए। वरिष्ठ उपाध्यक्ष ईश्वर पोरखेल, उपाध्यक्ष सुरेन्द्र पाण्डे, सचिव योगेश भट्टराईले भण्डारीको सदस्यताबारे कुरा उठाएपछि ओलीले कुरा गर्न पाएको छैन भन्दै टार्न खोजेका थिए।
सदस्यहरूले जोडबल गर्न थालेपछि सिरियस्ली कुरा गर्छु भनेको एक सदस्यले बताए।
'विद्या भण्डारीको सदस्यताबारे आज पनि कुरा उठ्यो। अध्यक्षले मैले कुरा गर्न पाएको छैन, सिरियसली भन्नुभयो। अब अर्को बैठकले यसबारे निर्णय गर्ने गरी म कुरा गर्छु भन्नुभयो,' ती नेताले भने।
गत केन्द्रीय कमिटीको बैठकको समापनमा अध्यक्ष ओलीले सदस्यताबारे भण्डारीसँग कुरा गर्ने बताएका थिए। त्यतिबेला अध्यक्ष ओलीले भण्डारीले नयाँ सदस्यताका लागि प्रक्रियासंगत ढंगले निवेदन दिए सदस्यता दिने बताएका थिए।
गत साउन ५ र ६ गते बसेको केन्द्रीय कमिटी बैठकले पूर्वराष्ट्रपति भण्डारीको नवीकरण भइसकेको सदस्यता रोक्ने निर्णय गरेको थियो। यसबारे एमालेमा विवाद सिर्जना भइरहेको छ। १० औं केन्द्रीय कमिटी बैठकमा पनि झन्डै ४० जना सदस्यहरूले भण्डारीको सदस्यता नवीकरण गर्न माग गरेका थिए।
नेताका घर जलाउने एमालेकै कार्यकर्ता
आजको सचिवालय बैठकमा केही सदस्यहरूले सचिवद्वय लेखराज भट्ट, रघुवीर महासेठको घर जलाउने एमालेकै कार्यकर्ता रहेको पाइएको प्रसंग निकालेका थिए। उनीहरूको पहिचान भइसक्दा पनि कारबाही नगरेको भन्दै ओलीलाई प्रश्न उठाएका थिए।
'लेखराज भट्टदेखि रघुवीर महासेठसम्मको घर जलाउने घर तोडफोड गर्न, आगजनी गर्न एमाले मानिसहरू आएका रहेछन्। ती मानिसहरूलाई कारबाही भएको छैन। अहिलेसम्म किन कारबाही नगरेको भन्दै सशक्त ढंगले उठाइयो,' ती नेताले भने, 'त्यस्ता मानिसहरू, जो आगजनीमा संलग्न छन्, तोडफोडमा उत्रिएका छन्, प्रमाणहरू छन् भने पार्टीले कारबाही गर्ने निर्णय भएको छ।'
कारबाही गर्न तल्ला कमिटीलाई निर्देशन दिइएको छ। कारबाही गरेर १५ दिनभित्र माथिल्लो कमिटीलाई जानकारी गराउन पनि निर्देशन दिइएको ती नेताले बताए।
पासाङ शेर्पालाई किन गरिएन निलम्बन?
पार्टी केन्द्रीय सदस्य एवम् पार्टी सम्बद्ध नेपाल लोकतान्त्रिक आदिवासी जनजाति महासंघ नेपालका अध्यक्ष पासाङ शेर्पालाई कारबाही नभएको भन्दै सचिवालय सदस्यहरूले बैठकमा कुरा उठाएको एक पदाधिकारीले बताए। उनका अनुसार बहुविवाह गरेको कसुरमा शेर्पाविरूद्ध जिल्ला अदालत काठमाडौंले एक वर्ष जेल र पाँच हजार रूपैयाँ जरिवानाको फैसला गरेको ती पदाधिकारीले बताए। जिल्ला अदालतको फैसला उच्च अदालत पाटनले पनि २०८१ असोज ६ गते सदर गरेको छ।
'यस्तो प्रकृतिको फौजदारी अभियोगमा कसुरदार प्रमाणित भएको व्यक्ति हाम्रो केन्द्रीय सदस्य कसरी रहिरहन सक्छ भन्दै हामीले प्रश्न उठायौं,' ती नेताले भने, 'फौजदारी अभियोगमा प्रहरी हिरासत र अहिले पुर्पक्षका लागि थुनामा रहेका सचिव टोपबहादुर रायमाझीलाई हामीले निलम्बन गरेका छौं। पासाङ शेर्पा किन निलम्बनमा परेनन्? तत्काल निलम्बन गर्नुपर्छ भन्यौं। अध्यक्ष ओलीले बुझ्छु भन्नुभएको छ।'
शेर्पासँग अधिकांश सचिवालय सदस्य रूष्ट छन्। १०औं केन्द्रीय कमिटी बैठकमा शेर्पाले अध्यक्ष ओलीको राजीनामा माग्ने सचिवालय सदस्यहरूलाई कारबाही गर्नुपर्ने धारणा राखेका थिए।
एकीकृत समाजवादीका असन्तुष्टहरूसँग समूहगत एकता हुँदैन
अध्यक्ष ओलीले एकीकृत समाजवादीका असन्तुष्टहरूसँग समूहगत वा पार्टीगत एकता नहुने बताएका छन्। एकीकृत समाजवादीले शुक्रबार माओवादी केन्द्रसँग एकता गर्ने निर्णय गरेपछि सम्मानित नेता झलनाथ खनाल, महासचिव घनश्याम भूसाल, स्थायी कमिटी सदस्य रामकुमारी झाक्रीसहितका नेता असन्तुष्ट हुँदै अर्को पार्टी गठनमा लागेका छन्।
यो पंक्ति एमालेमा जाने चर्चा भइरहेका बेला अध्यक्ष ओलीले त्यसरी आउने समूहसँग नै एकता नहुने र कोही व्यक्ति व्यक्तिगत रूपमा आउँछन् भने स्वागत गर्न तयार रहेको बताएका थिए।
'कुनै अमुक समूहसँग एकता हुँदैन। उहाँहरू (एकीकृत समाजवादीका असन्तुष्ट) सँग मैले कुरा गरेको छु। तपाईंहरू आउनुहोस् भनेको छु। व्यक्तिगत रूपमा दस–बीसजना आए पनि व्यक्तिगत नै हुनेछ। अलग्गै समूह बनाएर समूहगत रूपमा एमाले र फलानो समूहबीचमा पार्टी एकता भयो भन्ने कुरा हुँदैन,' ओलीको भनाइ उद्धृत गर्दै एक नेताले भने।
शुक्रबार अध्यक्ष ओलीले विगतमा एमाले छाडेर गएकाहरूलाई पुरानै घर फर्कन भन्दै आह्वानसमेत गरेका थिए।
-1762009573.jpeg)
-1746009348.jpg)
