प्रहरी महानिरीक्षक चन्द्रकुबेर खापुङले भदौ २३ र २४ गते भएको घटना सम्बन्धी छानबिन गर्न बनेको जाँचबुझ आयोगलाई स्पष्टीकरण बुझाएका छन्।
आयोगले आफ्नो कामकारबाहीमा बाधा पुर्याएको भन्दै आइजिपी खापुङलाई बुधबार २४ घन्टे स्पष्टीकरण सोधेको थियो।
आइजिपीले स्पष्टीकरण पठाइसकेको स्रोतले बतायो।
स्रोतका अनुसार जाँचबुझ आयोगले माग गरेको प्रहरीका विवरणसमेत प्रहरी प्रधान कार्यालयले आयोगलाई पठाइसकेको छ। विवरण ढिला पठाउने मनसाय नराखेको भन्ने बेहोरा उल्लेख गरिएको स्रोतले बताएको छ।
विवरण पठाएसँगै आयोगले बिहीबारदेखि प्रहरीको बयान सुरू गरेको छ। अहिले एक जना अधिकृतको बयान भएको छ। क्रमशः अरूको बयान लिने आयोगको तयारी छ।
जाँचबुझ आयोग गठन भएको केही समयमै भदौ २३ र २४ गते फिल्डमा को को खटिएका थिए भनेर प्रहरीसँग विवरण माग गरी पत्राचार गरिएको थियो।
पत्र आएको २२ दिनसम्म पनि प्रहरी प्रधान कार्यालयले त्यसको विवरण उपलब्ध गराएको थिएन। त्यसपछि आयोगले पत्र लेखेर विवरणबारे सोध्यो।
जबाफमा आइजिपीदेखि जवानसम्म खटिएको भनिएको थियो।
प्रहरीले विस्तृत विवरण नपठाएपछि आइतबार जाँचबुझ आयोगले आइजिपी चन्द्रकुबेर खापुङकै नाममा २४ घन्टाभित्र जबाफ पठाउन भनेर प्रधान कार्यालयमा पत्र पठाएको थियो।
यसरी पत्राचार गरेपछि प्रधान कार्यालयले यसको विवरण काठमाडौं उपत्यका प्रहरी कार्यालयसँग हुने र त्यहाँबाट विवरण उपलब्ध गराउन समय लाग्ने भनेर जबाफ फर्कायो।
प्रधान कार्यालयले नै उपलब्ध गराउनुपर्ने विवरण नदिएको भन्दै जाँचबुझ आयोगले बुधबार आइजिपी खापुङसँग स्पष्टीकरण सोधेको थियो।
-1746009348.jpg)
