राष्ट्रिय स्वतन्त्र पार्टी (रास्वपा) केन्द्रीय सदस्य डा तोसिमा कार्कीले विस्तारित बैठकमा चार बुँदे मार्गचित्र पेश गरेकी छन्।
उनले पार्टी पुनःगठनका लागि चार बुँदे रोडम्याप अघि सारेको बताएकी छन्। जेनजी आन्दोलनपछि समग्रमा नेपाल राष्ट्र पहिलेजस्तै अवस्थामा रहन नसक्ने उनको भनाइ छ।
‘किनभने सबै क्षेत्रमा आमूल सकारात्मक परिवर्तन उक्त आन्दोलनले माग गरेको छ। यस क्रममा राजनीतिक पार्टीहरूले समेत पुरानो अवस्थालाई चिरेर महत्वपूर्ण सुधारात्मक परिवर्तन गर्ने सोचलाई आत्मसात् गर्नै पर्दछ,’ उनले भनेकी छन्।
उनले आगामी मंसिरभित्रै पहिलो महाधिवेशनको माग गरेकी छन्।
‘महाअधिवेशन भनेको पार्टीको अक्सिजन हो। राष्ट्रिय स्वतन्त्र पार्टीको महाधिवेशन २०८२ मंसिरमै गर्नु पर्दछ। महाधिवेशनले पार्टीमा व्यापक सहभागिता, पार्टीको संगठन विस्तार, वैचारिक स्पष्टता एवं नयाँ ऊर्जा थप्ने हुनाले आगामी चुनावमा पार्टीको विजयका लागि ढोका खोल्दछ,’ उनको दृष्टिकोण छ।
एक वर्षअघि भएको राष्ट्रिय भेलाबाट पार्टी सभापति मार्फत मौजुदा केन्द्रीय समितिलाई महाअधिवेशन आयोजक समितीको रूपमा घोषणा भएको उनले स्मरण गराएकी छन्।
महाअधिवेशन आयोजक समिती घोषणापछि पनि केन्द्रीय सचिवालय र पदाधिकरी रहिरहनु र सचिवालय विस्तारसमेत गरिनुको आधार स्पष्ट नभएको उनले बताएकी छन्।
‘महाधिवेशनका लागि सकारात्मक वातावरण निर्माण गर्न पार्टीको मौजुदा कार्यकारी नेतृत्व (पदाधिकारी तथा सचिवालय) भंग गरी केन्द्रीय समितिलाई महाधिवेशन आयोजक समितिमा रूपान्तरण गर्नु पर्दछ। महाधिवेशन आयोजक समितिमा जेनजी, विभिन्न वैकल्पिक शक्तिहरू एवं बौद्धिक वर्गलाई पनि समावेश गर्नु पर्दछ। पार्टीको हालको कार्यकारी नेतरत्व समूह/सचिवालय समावेशी हुन नसकेको भनी जुन आलोचना भइरहेको छ, त्यसबाट पाठ सिकी महाधिवेशन आयोजक समिति र महाधिवेशनबाट गठन हुने केन्द्रीय समिति, सचिवालय तथा पदाधिकारीको संरचना नेपालको विविधतालाई वास्तविक प्रनिधित्व गर्ने गरी समावेशी बनाउनु पर्दछ,’ उनले भनेकी छन्।
त्यस्तै केन्द्रीय सदस्य कार्कीले विचार मिल्न सक्ने विभिन्न राजनीतिक पार्टीहरूसँग घन्टी चुनाव चिह्न साझा रहने गरी एकता गर्नुपर्ने बताएकी छन्।
‘यस क्रममा रास्वपाले उच्चतम उदार चरित्र देखाउँदै ठूला वा साना, दुवै खालका पार्टीहरूलाई एकता प्रक्रियामा स्वागत गर्नु पर्दछ,’ उनले भनेकी छन्।
रास्वपाले अब राष्ट्र निर्माणको वैचारिक नेतृत्व गर्नुपर्ने कार्कीको ठहर छ।
नेपालको हालसम्मको राजनीतिक परिदृश्यमा वामपन्थी र दक्षिणपन्थी ध्रुवीकरण नै प्रबल रहेको भन्दै तीमध्ये पनि कम्युनिज्म, समाजवाद, सोसल डेमोक्रेसी आदिको नारा भजाई गैरचरित्रबाट देशलाई ब्रम्हलुट गरिरहेको उनको भनाइ छ।
‘यस यथार्थ रहेको सन्दर्भमा देशको आर्थिक समुन्नति, स्वास्थ्य, शिक्षा, रोजगारी तथा प्राविधिक क्रान्ति साथै सांस्कृतिक स्वाभिमानको एजेण्डा स्थापित हुन सकेको छैन। देशलाई वामपन्थी र दक्षिणपन्थी ध्रुवीकरणमा फस्न नदिई लोककल्याणकारी राज्यको अवधारणा स्थापित गर्नका लागि रास्वपाले आफूलाई स्पष्टसँग मध्यमार्गी राजनीतिक पार्टीका रूपमा नयाँ धुर्विकरणको नेतृत्वको लागी अघि बढ्नु पर्दछ,’ उनको भनाइ छ।
रास्वपाको विस्तारित बैठक शनिबार चितवनका सकिएको छ। बैठकले भने चुनाव सकिएको ६ महिनाभित्र महाधिवेशन गरी सक्ने लक्ष्य निर्धारण गरेको छ।
-1746009348.jpg)
