नयाँ नेतृत्व चुन्नका लागि नेकपा (एमाले) ले ११ औं महाधिवेशन गर्दैछ।
मंसिर २७, २८, २९ गते काठमाडौंमा महाधिवेशनका गर्ने निर्णय गरिएको छ। आगामी मंसिर १३ गते एमालेले देशैभर एकैदिन प्रतिनिधिहरू छान्दैछ।
महाधिवेशन सुरू हुनुअगावै एमाले दोलखा जिल्ला कमिटीले केपी शर्मा ओलीलाई नै अध्यक्षमा निरन्तरता दिनुपर्ने निष्कर्ष निकालेको छ।
शनिबार बसेको जिल्लाको नवौं पूर्ण बैठकले अध्यक्ष ओली नै वर्तमान नेपालको राजनीतिक नेतृत्वमा र पार्टीको अध्यक्षमा रहिरहनुपर्ने अपरिहार्यता रहेको ठहर गरेको हो।
‘एमालेको अभिभावकको रूपमा रहेका राष्ट्रवादी नेता केपी शर्मा ओली नै वर्तमान नेपालको राजनीतिक नेतृत्वमा र पार्टीको अध्यक्षमा रहिरहनुपर्ने अपरिहार्यता रहेको वैठकले ठहर गरेको छ,’ बैठक पछि जारी सर्कुलरमा भनिएको छ।
११ औं राष्ट्रिय महाधिवेशन सफल बनाउनका लागि जिल्ला कमिटी दोलखाले एकताबद्ध भई बैठक, भेला, सभामार्फत प्रचारप्रसार गर्ने र तोकिएको समयमा सर्वसम्मत ढंगबाट महाधिवेशन प्रतिनिधि छनौट गरेर सकरात्मक सन्देश दिने प्रतिवद्धता पनि बैठकले गरेको छ।
एमालेको महाधिवेशन असफल पार्ने षड्यन्त्र सहित वर्तमान सरकार अघि बढेको एमाले दोलखाले बताएको छ।
‘एमालेको राष्ट्रिय ऐतिहासिक महाधिवेशन असफल पार्ने षड्यन्त्रसहित प्रतिशोधको भावनाबाट स्वचालित वर्तमान सरकारले नियतपूर्वक अध्यक्ष केपी शर्मा ओलीलाई स्थान हद गर्ने, बयान लिने, पक्राउ गर्ने, हिँडडुल र राजनीतिक गतिविधिमा अवरोध गर्ने जस्ता कार्यहरू गर्ने तयारी गरेकोमा यो बैठक आपत्ति प्रकट गर्दै त्यसको प्रतिरोध गर्ने घोषणा गर्दछ,’ सर्कुलरमा भनिएको छ।
-1746009348.jpg)
