नेकपा (एमाले) ले मंगलबार ७५३ वटै पालिका जनप्रदर्शन गरिरहेको छ। संविधानको रक्षा र प्रतिनिधि सभा पुनःस्थापनाको मुद्दा बोकेर आधारभूत तहमा जाने एमालेले निर्णय गरेको छ।
एमाले सचिवालय र केन्द्रीय कमिटी बैठकले वडा तहसम्मै जनपरिचालन गर्ने निर्णय गरेको थियो।
प्रतिनिधि सभा पुनर्स्थापनाका लागि जनदबाब सिर्जना गर्न र पार्टीको पक्षमा माहौल सिर्जना गर्न आधारभूत तहमा फर्किने नीति लिएको एमालेले मंगलबार पालिका तहमा आफ्नो शक्ति केन्द्रित गरेको हो।
एमालेका अनुसार आज बिहान ७ बजेदेखि नै प्रदर्शन सुरू भएको छ। प्रत्येक पालिकामा छुट्टाछुट्टै समयमा प्रदर्शन गर्ने नीतिअनुरूप केन्द्रीय नेताहरू परिचालित भएका छन्।
पालिका तहको प्रदर्शन व्यवस्थित गर्न एमाले महासचिव शंकर पोखरेलले पाँच बुँदे निर्देशन दिएका थिए।
प्रदर्शनलाई कर्कश नबनाउन सानो हाते माइक र हल्का साउन्ड सिस्टम प्रयोग गर्न निर्देशन दिएका थिए। त्यस्तै उनले घना बस्तीका बीचमा कोण सभा वा छोटो सभा गर्न पनि निर्देशन दिएका थिए।
एमालेले गत कात्तिक २२ गतेदेखि नै जनपरिचालनलाई तीव्रता दिएको छ। कात्तिक २२ गते ६ हजार ७४३ वडामै प्रदर्शन र भेला गरेको एमालेले कात्तिक २९ गते जिल्ला जिल्लामा प्रदर्शन गर्ने तयारी गरेको छ।
मंसिर ६ गते भने काठमाडौंमा विशाल प्रदर्शनको तयारी गरेको एमालेले बताएको छ।
आगामी मंसिर २७ गते पनि एमालेले शक्ति प्रदर्शनको तयारी गरेको छ।
एमालेको ११ औं महाधिवेशन मंसिर २७, २८, २९ गते काठमाडौंमा गर्दैछ। उद्घाटन सत्रको दिन मंसिर २७ गते पनि ठूलो आमसभाको तयारी गरेको छ।
तस्बिरहरू:
-1746009348.jpg)
