मधेस प्रदेशमा नयाँ मुख्यमन्त्री नियुक्तिको विरोधमा असन्तुष्ट ७ दलका नेता/कार्यकर्ताहरू धर्नामा बसेका छन्।
मधेस भवन अगाडि सडकमा उनीहरू बुधबार बिहानदेखि धर्नामा बसेका हुन्।
धर्नामा सहभागीले संविधान मिच्न पाइँदैन, नवनियुक्त मुख्यमन्त्रीलाई बर्खास्त गर, संविधानको धारा १६८ (२) लागू गर लगायत नाराबाजी समेत गरेका छन्।
मधेस भवनको २ नम्बर गेटमा उनीहरूले शान्तिपूर्ण धर्ना सुरू गरेका थिए। धर्नामा ७ दलका नेता तथा कार्यकर्ताहरू क्रमशः थपिँदै गएका छन्।
७ दलका धनुषा जिल्ला अध्यक्षहरूले मंगलबार नै विज्ञप्ति जारी गर्दै विरोध तथा शान्तिपूर्ण आन्दोलनमा सहभागी हुन आह्वान गरेका थिए।
धर्नामा प्रदेश सभा सदस्यहरू समेत सहभागी छन्। आन्दोलनको सुरूआत सडक पेटीमा बसेर गरिए पनि भिड बढेसँगै उनीहरू सडक नै जाम हुने गरी प्रदर्शन गरिरहेका छन्।
७ दलले शान्तिपूर्ण आन्दोलनमा सुरक्षाकर्मीद्वारा गरिएको लाठी चार्ज, अश्रुग्यास प्रहारको विरोध गरेका छन्।
प्रदर्शनकारीमाथि क्रुरतापूर्वक दमन भएको भन्दै उनीहरूले घटनाको घोर भत्र्सना गर्दै घटनामा संलग्न सुरक्षाकर्मीहरूलाई आवश्यक कारबाहीका माग समेत गरेका छन्।
कात्तिक २२ गते तत्कालीन प्रदेश प्रमुख सुमित्रा सुवेदी भण्डारीले संविधानको धारा १६८ (३) बमोजिम मधेस प्रदेश सभामा प्रतिनिधित्व गर्ने सबभन्दा ठूलो दल नेकपा एमालेका नेता सरोजकुमार यादवलाई मुख्यमन्त्री नियुक्त गरेपछि मधेस प्रदेशको राजधानीको अवस्था तनावपूर्ण छ।
उनीहरूले मुख्यमन्त्री यादव सहित मन्त्रिपरिषदका अन्य सदस्यहरूलाई बहिस्कार गर्न समेत आह्वान गरेका छन्।
नवनियुक्त मुख्यमन्त्री सरोज कुमार यादव भने बुधबार काठमाडौं प्रस्थान गरेका छन्। बिहान प्रादेशिक अस्पतालमा मंगलबार भएको प्रदर्शनका घाइतेहरूसँग भेटघाट समेत गरेका थिए। उनले घाइतेहरूको निःशुल्क उपचारको व्यवस्था मिलाउन निर्देशन समेत दिएका छन्।
मुख्यमन्त्री यादवले मंगलबार साँझ मधेस भवनस्थित मुख्यमन्त्री तथा मन्त्रिपरिषदको कार्यालयमा पदभार ग्रहण गर्दै गर्दा बाहिरको अवस्था तनावपूर्ण बनेको थियो। प्रहरी र प्रदर्शनकारीबीच झडप हुँदा कम्तीमा २१ जना घाइते भएका थिए।
-1762934338.jpg)
-1746009348.jpg)
