अनेरास्ववियुले अध्यक्षबाट डा. सुजन कडरियाको राजीनामा स्वीकृत गर्दै महासचिव दीपक धामीलाई अध्यक्ष चुनेको छ।
गत भदौ २४ गते जेनजी आन्दोलनपछि अध्यक्ष कडरियाले पदबाट राजीनामा दिएका थिए। सोमबार बसेको पदाधिकारी बैठकले धामीलाई अध्यक्ष बनाउने निर्णय गरेको हो।
महासचिवमा उपाध्यक्ष रहेकी अञ्जना सिवाकोटीलाई चुनेको छ।
अध्यक्षबाट राजीनामा दिएका कडरिया पदमा फर्कने प्रयास पनि गरेका थिए तर संगठनभित्रै विवाद भएको थियो।
नवनियुक्त अध्यक्ष धामीलाई कडरियाले पनि बधाई दिएका छन्।
‘आज बसेको अनेरास्ववियुको बैठकले मेरो राजीनामा स्वीकृत गरिदिएकोमा हार्दिक धन्यवाद व्यक्त गर्दछु। यस यात्रामा मलाई साथ, मार्गदर्शन र प्रेरणा दिनुहुने सबै अग्रज तथा सहयोद्धाप्रति म सदैव कृतज्ञ रहनेछु।आजबाट विद्यार्थी आन्दोलनमा बिताएका तिता–मिठा क्षणहरू पनि औपचारिक रूपमा समाप्त भएका छन्,’ उनले फेसबुकमा लेखेका छन्।
उनले आफूलाई पार्टी जीवनमा पूर्ण समर्पणका साथ प्रवेश गर्दै नेकपा एमालेको एक इमानदार सिपाहीको रूपमा निरन्तर खटिरहन बताएका छन्।
‘कुनै पनि अधुरो अन्त्य वास्तवमै अन्त्य हुँदैन, यो नयाँ यात्राको सुरुआत मात्र हो। आजको बैठकबाट जिम्मेवारी पाउनुभएका अध्यक्ष दीपक धामीज्यू लगायत सम्पूर्ण नेतृत्वलाई हार्दिक बधाई तथा शुभकामना व्यक्त गर्दछु। भदौ २३ गतेको आन्दोलनमा प्रहरीको गोलीले विद्यार्थीको रगत बगेको क्षणसँगै मेरो अनेरास्ववियु यात्रा अन्त्य भएको सत्यलाई आजको गरिमामय बैठकले आधिकारिक मान्यता दिएकोमा म सम्मान व्यक्त गर्दछु,’ उनले भनेका छन्।
यस प्रक्रियामा पार्टीले कुनै हस्तक्षेप नगरेको पनि उनले बताएका छन्।
‘हाम्रो सार्वभौम कमिटीको सर्वसम्मतिले पारित गरेको निर्णयलाई उल्लासपूर्वक पालना गर्न देशभरका सबै देशभक्त विद्यार्थीसमक्ष हार्दिक अपिल गर्दछु,’ उनले भनेका छन्।
