नेकपा (एमाले) को भ्रातृ संगठन अनेरास्ववियु भित्रको विवाद निरूपण भएको छ।
गत भदौ २४ गते जेनजी आन्दोलन उत्कर्षमा पुगेपछि महाधिवेशनबाट निर्वाचित अध्यक्ष डा. सुजन कडरियाले पदबाट राजीनामा दिएका थिए।
तर गत कात्तिक २४ गते पार्टीले घर फर्क अभियान चलाएको भन्दै उनी दलबलसहित राष्ट्रिय सभा गृह र त्यसपछि संगठनको कार्यालयसमेत गएका थिए।
त्यसपछि असन्तुष्ट समूहले उनलाई रोक्न खोजेपछि एमाले अखिलभित्रको विवाद उत्कर्षमा पुगेको थियो।
कडरियाकै टीमबाट महासचिव जितेका दीपक धामीलगायतले उनलाई रोक्नुपर्ने भन्दै विज्ञप्ति निकालेका थिए।
उपमहासचिव कमल जोशी कडरियाको पक्षमा उभिँदै उनको प्रतिरक्षा गरेपछि एमालेले मिलाउने जिम्मा जनसंगठन संयन्त्र प्रमुख भानुभक्त ढकाल र विद्यार्थी इन्चार्ज किशोरविक्रम मल्ललाई दिएको थियो।
पार्टीकै पहलमा सोमबार अखिलको पदाधिकारी बैठक बसेर विवाद निरूपण गरेको पूर्वअध्यक्ष समिककुमार बडालले जानकारी दिए।
उनकाअनुसार अहिले महासचिव धामीलाई अध्यक्ष बनाउने निर्णय गरिएको छ। उपाध्यक्ष जितेकी अञ्जना सिवाकोटीलाई महासचिव बनाउने निर्णय भएको छ।
‘महासचिव धामीलाई अध्यक्ष बनाउने निर्णय भयो। उपाध्यक्ष अञ्जनालाई महासचिव बनाउने निर्णय भयो,’ उनले भने, ‘जनसंगठन संयन्त्र प्रमुख, विद्यार्थी इन्चार्जले सहजीकरण गर्नुभयो।’
उनले राजीनामा स्वीकृत भएका तत्कालीन अध्यक्ष डा. सुजन कडरियालाई समेट्ने जिम्मा पार्टीको भएको भन्दै त्यसको प्रक्रियाबारे आफूलाई थाहा नभएको बताए।
उनकाअनुसार धामी र शिवाकोटीबीच कार्यकाल बाँड्ने सहमति भएको छ। सहमतिअनुसार धामी २०८३ जेठसम्म अध्यक्ष बन्नेछन्। त्यसपछि राष्ट्रिय भेला गरेर सिवाकोटीलाई अध्यक्ष बनाउने समझदारी भएको छ।
‘जेठमा दीपक धामीको उमेर पूरा हुन्छ,’ उनले भने, ‘त्यसपछि राष्ट्रिय भेला गर्ने सहमति भएको छ।’
विधानतः अनेरास्ववियुको महाधिवेशन दुई–दुई वर्षमा हुन्छ।
एमालेका एक नेताले जानकारी दिएअनुसार अखिल छाडेका कडरियालाई पार्टीको आगामी महाधिवेशनको प्रतिनिधि बनाउने निर्णय भएको छ।
आफ्नो व्यवस्थापन हुने भए पनि नवनियुक्त अध्यक्ष धामी र महासचिव सिवाकोटीलाई उनले बधाई दिएका छन्। पार्टीले हस्तक्षेप नगरी अनेरास्ववियुको विवाद समाधान भएको भन्दै उनले खुसी पनि प्रकट गरेका छन्।
गत जेठमा अनेरास्ववियुको महाधिवेशनबाट कडरिया अध्यक्षमा सात मतले जितेका थिए।
उनले प्रकाश पौडेललाई सात मतान्तरले पराजित गरेका हुन्। सोमबार बसेको पदाधिकारी बैठकमा धामीलाई अध्यक्ष बनाउने विषयमा पदाधिकारीबीच विमति नभए पनि सिवाकोटीलाई महासचिव बनाउने विषयमा मतान्तर देखिएको थियो।
सचिव आकाश घर्तीले असहति राखेका थिए।