अमेरिकी राष्ट्रपति डोनाल्ड ट्रम्प पत्रकारसँग फेरि जंगिएका छन्।
ट्रम्प मंगलबार साउदी राजकुमार मोहम्मद बिन सलमान (एमबिएस)लाई भव्य स्वागतपछि ह्वाइट हाउसमा उनीसहितको संयुक्त पत्रकार सम्मेलनका क्रममा एक पत्रकारको प्रश्नमा ट्रम्प जंगिएका हुन्।
एबिसी न्युजकी एक पत्रकारले साउदी राजकुमार एमबिएसलाई वाशिङ्टन पोस्टका पत्रकार जमाल खशोग्गीको हत्याबारे प्रश्न गरेकी थिइन्।
उनले अमेरिकी गुप्तचरको रिपोर्टले पत्रकार खशोग्गीको हत्या गर्न साउदी राजकुमारले नै आदेश दिएको भनेर उल्लेख गरेको बताउँदै त्यसबारे प्रश्न गरेकी थिइन्।
सँगै सन् २००१ सेप्टेम्बर ११ मा भएको आतंकवादी हमला र साउदीको संगलग्नताबारे पनि चर्चा गरेकी थिइन्।
'तपाईंलाई अमेरिकाले किन विश्वास गर्ने?,' उनले प्रश्न गरेकी थिइन्।
प्रश्नपछि ट्रम्पले तत्कालै हस्तक्षेप गरेका थिए। उनले प्रश्न सोध्ने पत्रकारको परिचय मागे। पत्रकारले आफू एबिसी न्युजको प्रतिनिधि रहेको बताइन्।
'फेक न्युज। एबिसी फेक न्युज हो। तर त्यो प्रश्नको जबाफ म दिन्छु,' ट्रम्पले भने।
'तपाईंले कुरा गरिरहनुभएको ती व्यक्तिलाई धेरैले मन पराउँदैनथे। तपाईंले उनलाई मन पराउनुहोस् वा नपराउनुहोस्, घटनाहरू हुन्छन्,' उनले अगाडि भने।
उनले आफ्नो पाहुनालाई त्यस्तो प्रश्न गरेर लज्जित नबनाउन पनि ती पत्रकारलाई चेतावनी दिए।
'त्यो घटनाबारे उहाँलाई केही थाहा थिएन। तपाईंले हाम्रो अतिथिलाई यस्तो प्रश्न गरेर लज्जित बनाउन पाउनुहुन्न,' ट्रम्पले भने।
त्यसपछि एमबिएसले ट्रम्पलाई रोक्दै आफू पनि त्यसको उत्तर दिने बताए।
उनले ९/११ को घटना दुःखद रहेको बताए।
त्यसमा संलग्न ओसामा बिन लादेनले अमेरिका र साउदीको सम्बन्ध बिगार्नकै निम्ति त्यो हमला गरेको उनले बताए।
' ९/११ को घटना दुःखद हो। सिआएको प्रतिवेदनले पनि प्रष्ट भनेको छ कि ओसामा बिन लादेनले साउदी अरबका मानिसहरू प्रयोग गरी दुई देशको सम्बन्धमा दरार पैदा गर्नका लागि त्यो हमला गरेका थिए,' उनले भने।
पत्रकारको हत्या भएको विषय पनि दुःखद रहेको उनले बताए।
'कोही पनि मानिसहरू मारिनु दुःखद हो। हामीले यसबारे अनुसन्धान गरेका छौं। ८ जना जेलमा छन्। यो ठूलो गल्ती थियो। जुन अब हुने छैन,' उनले भने।
साउदी सरकारका कट्टर आलोचक खशोग्गी २०१८ अक्टोबर २ मा हत्या भएको थियो।
त्यतिबेला साउदी महावाणिज्य दूतावासमा प्रवेश गरेपछि उनी बेपत्ता भएका थिए। दूतावासभित्रै उनको हत्या भएको थियो।
टर्कीको गुप्तचर निकायले प्राप्त गरेको एउटा अडियो रेकर्डिमा खशोग्गीले साउदी एजेन्टहरूसँग गरेको सङ्घर्ष, उनको हत्या र उनको शरीरमा हड्डी काट्ने आरा प्रयोग भएको आवाजहरू कैद भएका थिए।
उनको हत्यापछि पहिलोपटक राजकुमार एमबिएस अमेरिका आएको भनेर न्यूयोर्क टाइम्सले लेखेको छ।
-1746009348.jpg)
