नेपाली कांग्रेसका महामन्त्री विश्वप्रकाश शर्माले सिमरा घटनाप्रति दु:ख व्यक्त गर्दै प्रधानमन्त्री सुशीला कार्कीलाई ध्यानाकर्षण गराएका छन्।
उनले देश भ्रमणको वातावरण नगराए फागुन २१ मा कसरी चुनाव हुन्छ भनेर प्रधानमन्त्रीको ध्यानाकर्षणसमेत गराएका हुन्।
आज बाराको परवानीपुरमा एमालेनिकट युवा संघले जागरण सभा गर्दै थियो, उक्त सभाका लागि एमाले महासचिव शंकर पोखरेललगायत नेताहरू जाँदै थिए।
तर एमाले नेताहरू आउने भनेपछि बिहानैदेखि सिमरा विमानस्थल क्षेत्रमा जेनजी पुस्ता युवा र एमाले समर्थित युवाबीच झडप भयो।
जिल्ला प्रशासन कार्यालयले बेलुकी ८ बजेसम्मका लागि कर्फ्यू आदेश जारी गरेको छ।
यस घटनाप्रति कांग्रेस महामन्त्री शर्माले दु:ख व्यक्त गरेका छन्।
‘सिमरा घटना दु:खद छ। प्रधानमन्त्रीज्यूलाई ध्यानाकर्षण- एक फेरा भ्रमणको वातावरण नबनाए, चुनाव कसरी हुन्छ?,’ शर्माले सामाजिक सञ्जाल फेसबुकमा पोस्ट गरेका छन्, ‘एमाले चुनावको विपक्षमा उभिएको छ त, उसलाई चुनावमा आउन आग्रह गरौंl मधेस प्रदेशमा सहि कर्म गरेन त, त्यसविरुद्ध दबाब दिउँ l जेनजीविरुद्ध आवेगका अभिव्यक्ति दिएका छन् त, संयमले बोल्न भनौं तर आफ्ना कुरा राख्न कहिँ पनि भ्रमण गर्ने संविधान प्रदत्त अधिकार कसैको पनि कुण्ठित गर्न मिल्दैन त्यसले झनै द्वन्द्व बढाउँछ, यो समय संयम र एकता राख्नुपर्ने समय होl’
महामन्त्री शर्माले सामाजिक सञ्जाल निषेधविरूद्ध उभिने जेनजी कसैको `समाज भ्रमण अधिकार´ विरुद्ध उभिन नसक्ने पनि बताएका छन्। ‘अत सिमरा घटना जेनजीको भावना होइन, त्यसको दुरूपयोग होl निषेधको राजनीति कसैले नगरौं,’ शर्माले भने।
