नेकपा (एमाले) सचिवालय बैठकमा मधेसमा पार्टी ठूलो दल हुँदाहुँदै एक्लिन पुगेको भन्दै सचिवालय सदस्यहरूले प्रश्न उठाएका छन्। बिहीबार पार्टी केन्द्रीय कार्यालय च्यासलमा बसेको ६० औं सचिवालय बैठकमा वरिष्ठ उपाध्यक्ष ईश्वर पोखरेल, उपाध्यक्षहरू सुरेन्द्र पाण्डे, अष्टलक्ष्मी शाक्य, युवराज ज्ञवाली, सचिवहरू गोकर्ण विष्ट, योगेश भट्टराई, रघुवीर महासेठ लगायत नेताहरूले संविधानको धारा १६८ (३) अन्तर्गत् पार्टी नेतृत्वको सरकार बनाउने नाममा एमाले एक्लिन पुगेको धारणा राखेका हुन्।
‘मधेसमा हामीले ठूलो संकटबाट आन्दोलन जोगाएर ल्याएका थियौं। अनेकौं प्रतिकूलताबीच पनि त्यहाँ एमाले पहिलो शक्ति बनिसकेको थियो। आज एक व्यक्तिलाई मुख्यमन्त्री बनाउन जसरी हामीले विधि, पद्धति, परम्परा कुल्चियौं, त्यसले एमालेको धज्जी उडेको छ। आज मधेसमा एमाले एक्लिने परिस्थिति बनेको छ, यसको निर्मम समीक्षा होस्,’ सात जना सचिवालय सदस्यले एक स्वरमा भनेका थिए।
सरोजकुमार यादवलाई मुख्यमन्त्री बनाउनकै लागि मर्यादा भुल्दा पार्टीलाई मात्रै नभई लोकतन्त्र, संघीयताप्रति पार्टीको प्रतिबद्धता नै कमजोर बन्न पुगेको उनीहरूले बताएका थिए।
गत कात्तिक २४ गते एमाले मधेस संसदीय दलका नेता सरोजकुमार यादवलाई त्यहाँकी तत्कालीन प्रदेश प्रमुख सुमित्रा सुवेदी भण्डारीले बर्दिबासको पानस होटलमा शपथ गराएकी थिइन्।
त्यसपछि मधेसको संकट गहिरिँदै गएको छ। एमालेविरूद्ध बाँकी दलहरू एकठाउँ उभिएका छन्। एमालेबाटै निर्वाचित भएका सभामुख रामचन्द्र मण्डललाई आचरणको प्रश्न उठाएर प्रदेशसभाले पदमुक्त गरिसकेको छ।
प्रदेश प्रमुख भण्डारीलाई सरकारले त्यही दिन बर्खास्त गरेको थियो। मुख्यमन्त्री यादवविरूद्ध पनि अदालतमा मुद्दा परेको छ। अदालतले कुनै पनि नीतिगत निर्णय नगर्न अन्तरिम आदेश दिएको छ। अहिले एमालेविरूद्ध अरू दलहरू आन्दोलित भएको अवस्था छ।
त्यसको असर बारामा समेत परेको छ। बाराको परवानीपुरमा एमाले युवा संघले आयोजना गरेको कार्यक्रममा जान खोजेका पार्टी महासचिव शंकर पोखरेल, जनसंगठन समन्वय संयन्त्र प्रमुख भानुभक्त ढकाल, पोलिटब्युरो सदस्य महेश बस्नेता नेता काठमाडौंमै रोकिएका थिए। एमाले नेताहरू बारा आउने थाहा पाएपछि विरोधमा उत्रिएका जेनजी युवाबीच झडपसमेत भएर कर्फ्यू लगाउन परेको थियो। बारा बिहीबार पनि अशान्त थियो। शुक्रबार वार्ताको प्रयास भइरहेको छ।
यसरी मधेसमा पार्टी पहिलो हुँदाहुँदै रक्षात्मक अवस्थामा पुगको भन्दै सदस्यहरूले प्रश्न उठाएका हुन्।
-1746009348.jpg)
