सिमरामा बुधबारदेखि सुरू भएको तनाव बिहीबारसम्मै जारी रह्यो।
जेनजी युवा र एमाले कार्यकर्ताबीच झडप भएपछि बुधबारदेखि सुरू भएको विवाद समाधान नहुँदा बिहीबार दिनभरि नै सिमरा तनावग्रस्त बन्यो।
बुधबार युवासंघले आयोजना गरेको कार्यक्रममा एमाले महासचिव शंकर पोखरेल र पोलिटब्युरो सदस्य महेश बस्नेत सिमरा जान लागेका थिए।
सिमरामा बुधबार नै जेनजीहरूले प्रदर्शन गरिरहेका थिए। त्यसै क्रममा एमाले कार्यकर्ताहरूले जेनजी समूहका स्थानीय संयोजक सम्राट उपाध्याय लगायतमाथि कुटपिट गरेका थिए।
जेनजी समूहमाथि कुटपिट भएको घटना सार्वजनिक भएपछि बुधबार मध्याह्नसम्म सिमरामा ठूलो संख्यामा जेनजीहरू भेला भएका थिए।
स्थिति तनावग्रस्त बनेपछि स्थानीय प्रशासनले कर्फ्यू जारी गरेको थियो।
छलफलबाट विवाद साम्य पार्नका लागि जिल्ला प्रशासन कार्यालयले जेनजी प्रतिनिधिहरूलाई वार्तामा बोलाएको थियो।
तर कुटपिट गर्ने मुख्य व्यक्तिलाई पक्राउ नगरेसम्म जेनजीहरूले वार्तामा नबस्ने बताएका थिए।
जेनजी युवाहरूको किटानी जाहेरीका आधारमा बिहीबार बिहानै प्रहरीले दुई वडाध्यक्षलाई पक्राउ गरेको थियो।
कुटपिट गर्ने मुख्य व्यक्ति भनिएका जीतपुर सिमरा उपमहानगरपालिका–२ का ३८ वर्षीय अरबिन्द साह पनि बेलुकी पक्राउ परे।
उनलाई पक्राउ गरिसक्दा पनि जेनजी युवाहरू वार्तामा नबसेपछि युवा तथा खेलकुदमन्त्री बब्लु गुप्ता र जेनजी प्रतिनिधिहरू बारा घटनाबारे वार्ता तथा छलफलका लागि सिमरा गएका थिए।
बिहीबार साँझ मन्त्री गुप्तासँगै 'हामी नेपाल' का संयोजक सुदन गुरूङ, जेनजी प्रतिनिधि पुरूषोत्तम यादव, डा. अभिषेक सिंह लगायत सिमरा गएका थिए।
आफूहरू पुगेपछि सहमतिको बाटो खुलेको डा. सिंहले जानकारी दिए।
'हामी जनकपुरमै छौं। आन्दोलित जेनजीहरूसँग राति नै कुरा गर्यौं। मुख्य मान्छे हिजै पक्राउ परिसक्यो। अब सहमतिको ढोका खुल्छ,' डा. सिंहले सेतोपाटीसँग भने।
जेनजीले उठाएका अरू मागहरूका विषयमा पनि थप कुरा गर्ने डा. सिंहले बताए।
'अरू मागहरू पनि राख्नुभएको रहेछ। त्यसलाई कसरी सम्बोधन गर्न सकिन्छ भनेर छलफलमै छौं,' उनले भने।
बिहीबार दिउँसो प्रदर्शनकारी र प्रहरीबीच झडप हुँदा स्थिति नियन्त्रणमा लिन प्रहरीले हवाई फायर र अश्रुग्यास प्रहार गरेको थियो। यहाँ साँझ ८ बजेसम्म कर्फ्यू लगाइएको थियो।
झडपमा ६ जना प्रहरी र ४ जना जेनजी प्रदर्शनकारी घाइते भएका छन्।
घाइते हुने जेनजी प्रदर्शनकारीमा निशान्त श्रेष्ठ, सन्देश घिमिरे, सुमित चौधरी, निलहरी सापकोटा छन्।
तीमध्ये दुई जनालाई थप उपचारका लागि वीरगन्ज पठाइएको प्रहरीले जनाएको छ भने दुई जनाको सिमरा अस्पतालमा उपचार भइरहेको छ।
-1763621663.jpg)
-1746009348.jpg)
