नेकपा (एमाले) निकट नेशनल भोलेन्टियर फोर्सले जेनजी अगुवा र सम्राट उपाध्यायलाई सरकारले कारबाही नगरे परिस्थितिजन्य प्रतिरोध गर्ने चेतावनी दिएको छ।
आइतबार विज्ञप्ति जारी गर्दै फोर्सका संयोजक पुष्पराज श्रेष्ठले जेनजी आन्दोलन अपहरण गर्ने गुरूङ र भदौ २४ गते नेताहरूका घरमा आगजनीमा संलग्न उपाध्यायले धाकधम्कीको भाषा बोल्ने, अराजक गतिविधि गरिरहेकाले कारबाहीको दायरामा ल्याउन माग गरेका हुन्।
‘हिजो जेनजी आन्दोलनको ह्याइज्याकर तथा योजनाकार कथित नेता भनिने सुदन गुरुङ लगायत अराजकहरूको समूहले पार्टी कामको सिलसिलामा काठमाडौंमा रहेका पूर्वमन्त्री तथा एमालेका नेता किसान श्रेष्ठको जितपुर सिमरा–४ औराहामा रहेको घरमा पुगेर गुण्डागर्दी शैलीमा परिवारका सदस्य तथा पुनर्निर्माणमा खटिएका कामदार धम्काएकोप्रति हाम्रो संगठनको ध्यानाकर्षण भएको छ,’ विज्ञप्तिमा उल्लेख छ, ‘भाद्र २३ र २४ गतेको जेन जी आन्दोलनको क्रममा सरकारी कार्यालयदेखि लिएर निजी घरमा आगजनी गर्ने घटनाका मुख्य योजनाकार सम्राट उपाध्याय अहिले पनि खुलेआम हिँडिरहेका छन्।’
सुशीला कार्की नेतृत्वको सरकारले उनीहरूलाई कारबाही गर्नुको सट्टा संरक्षण गरिरहेको फोर्सको आरोप छ।
उनीहरूको संरक्षणमा लाग्नुले सरकार लोकतन्त्रमा होइन अराजकतामा विश्वास गर्छ र त्यसलाई प्रश्रय दिन्छ भन्ने पुष्टि भएको पनि उनीहरूले आरोप लगाएका छन्।
‘तसर्थ देश, जनता र पार्टी पंक्ति सुरक्षाको लागि जनताको सुरक्षा जनता मार्फत् नै भन्ने उद्देश्यले स्थापना भएको हाम्रो संगठन हामी नेपालका सुदन गुरुङ र सम्राट उपाध्यायलगायत अराजक झुन्डहरूलाई यथाशीघ्र आवश्यक कारबाही अघि बढाउन जोडदार माग गर्दछ र साथै सरकारले उक्त घटनाको सवेदनशीलतालाई नबुझ्ने हो र अपराधीलाई उन्मुक्ति दिने हो परिस्थितिजन्य प्रतिरोधको जिम्मेवारी सरकारले लिनु पर्ने चेतावनी पनि दिन चाहन्छौं,’ विज्ञप्तिमा भनिएको छ।
-1763886130.jpeg)
-1746009348.jpg)
