अमेरिकी राष्ट्रपति डोनाल्ड ट्रम्पले आगामी अप्रिलमा बेइजिङ भ्रमण गर्न सहमति जनाएको र चिनियाँ राष्ट्रपति सी चिनफिङलाई अर्को वर्ष अमेरिका आमन्त्रण गरेको जानकारी दिएका छन्।
यो निर्णय दुवै नेताहरूबीच भएको टेलिफोन संवादपछि आएको हो।
झन्डै एक महिनाअघि दक्षिण कोरियामा भेटेका ट्रम्प र सीबीच सोमबारको फोन कुराकानीमा व्यापार, युक्रेनमा रूसी आक्रमण, फेन्टानिल औषधि, ताइवान लगायतका मुद्दाबारे चर्चा भएको ट्रम्पले बताएका छन्।
ट्रम्पले आफ्नो 'ट्रुथ सोसल' पोस्टमा लेखेका छन्, 'हाम्रो चीनसँगको सम्बन्ध अत्यन्तै बलियो छ।'
चिनियाँ सरकारी समाचार एजेन्सीले दुवै देशले बराबरी र पारस्परिक हितका आधारमा बनेको वर्तमान सकारात्मक गतिलाई निरन्तरता दिनुपर्ने उल्लेख गरेको छ।
अक्टोबरमा दक्षिण कोरियाको बुसानमा भएको भेटपछि दुवै नेताले शुल्कसम्बन्धी विवादमा अस्थायी युद्धविराम गर्न सहमति जनाएका थिए।
अमेरिकाले फेन्टानिल औषधि तस्करी रोक्ने उद्देश्यले लगाइएको २० प्रतिशत शुल्क आधा गर्ने निर्णय गरेको थियो। तर चीनबाट आयात हुने वस्तुमा औसत ५० प्रतिशत शुल्क अझै कायम छ।
चिनियाँ वक्तव्यमा भनिएको छ, 'चीन–अमेरिका सम्बन्ध स्थिर र सकारात्मक दिशामा अघि बढिरहेको छ, जसलाई दुवै देश र अन्तर्राष्ट्रिय समुदायले स्वागत गरेका छन्।'
पछिल्लो समझदारीपछि अमेरिकाले चिनियाँ सामानमा थप १०० प्रतिशत शुल्क लगाउने चेतावनी फिर्ता लिएको छ भने चीनले दुर्लभ खनिजको निर्यातमा कडाइ गर्ने योजना स्थगित गरेको छ।
ह्वाइट हाउसकी प्रेस सेक्रेटरी क्यारोलिन लेभिटका अनुसार, करिब एक घन्टा लामो फोन वार्ताको मुख्य विषय व्यापार थियो।
उनले भनिन्, 'हामी चीनतर्फबाट देखिएको व्यवहारबाट सन्तुष्ट छौं, र उनीहरू पनि त्यही भावना राख्छन्।'
वार्तामा रू–युक्रेन युद्ध र ताइवानको भविष्य पनि उठेको चिनियाँ पक्षले जनाएको छ।
-1763886130.jpeg)
-1746009348.jpg)
