नेपाली कांग्रेसका महामन्त्री विश्वप्रकाश शर्माले विशेष महाधिवेशनबाट पछि हट्ने अवस्था नरहेको बताएका छन्।
कांग्रेसको विधानमा विशेष महाधिवेशन दर्ताको दफा रहेको तर फिर्ताको नरहेको उनको भनाइ छ।
‘कांग्रेसको विधान भन्छ- विशेष महाधिवेशन दर्ताको दफा छ, फिर्ताको दफा छैन। त्यसैले विशेषको ब्याक गियर हुन्न, ९० दिनभित्र विशेष महाधिवेशन गर्नैपर्छ,’ जेनजी आन्दोलनमा आगजनीमा परेको उदयपुरस्थित कांग्रेस कार्यालय आज अवलोकनपछि महामन्त्री शर्माले भने।
उनले पुस मसान्तभित्र नियमित महाधिवेशन गर्ने सहमति जुटे विशेष महाधिवेशन पक्षको पनि माग सम्बोधन हुने उल्लेख गरेका छन्।
‘पुस मसान्तभित्र नियमित महाधिवेशन गर्ने सहमति जुटेमा बिशेष महाधिवेशनको माग सम्बोधन हुन्छ,’ उनले भने।
साथै उनले दुई महामन्त्री के भन्छन् वा '७ भाइ' के भन्छन् भन्ने कुरा मुख्य नरहेको बताए।
‘असोज २८ मा लिखित वक्तव्यमार्फत सभापति शेरबहादुर देउवाले जुन संयम, समन्वय र परिपक्वताको सन्देश दिनु भएको थियो, अब त्यो कायम राख्ने कि नराख्ने मुल प्रश्न होl उहाँको वक्तव्यमा `मंसिरमा महाधिवेशन´ छुट्नु हुन्न थियोl त्यो छुट्नु गल्ती प्रमाणित भएको छ,’ शर्माले भने, ‘पार्टी र देशको आजको समाधानका लागि सभापतिज्यूले निर्णायक पहलकदमी लिनुपर्छl उहाँको सकारात्मक हस्तक्षेपले पार्टीलाई समाधानमा पुर्याउने मलाई विश्वास छl’
नेपाली कांग्रेसभित्र महाधिवेशनबारे विवाद छ। चुनावअघि महाधिवेशन गर्ने वा नगर्ने तथा नियमित कि विशेष भन्नेमा मतभेद देखिन्छ।
महाधिवेशनबारे निर्णय गर्न कांग्रेसले मंसिर ११ गते केन्द्रीय समिति बैठक आह्वान गरेको छ।
-1746009348.jpg)
