नेकपा (एमाले) का उपमहासचिव प्रदीप ज्ञवालीले कार्यवाहक प्रमुख निर्वाचन आयुक्त रामप्रसाद भण्डारीको अभिव्यक्तिमाथि प्रश्न उठाएका छन्। ज्ञवालीले भण्डारीले पहिलो संविधान सभाका बेला हजारौं लडाकु र हतियार बाहिरै राखेर निर्वाचन गराएको सन्दर्भ उल्लेख गरेको भन्दै ज्ञवालीले टिप्पणी गरेका हुन्।
‘कार्यवाहक प्रमुख निर्वाचन आयुक्त रामप्रसाद भण्डारीज्यूले निर्वाचनमा सुरक्षाको विषयलाई लिएर हजारौं लडाकु र हतियार बाहिरै राखेर निर्वाचन गराएको मुलुकमा केही थान हतियार बाहिर भएकै कारण निर्वाचन हुन सक्दैन भन्नु गलत हो भन्नुभएको सुनियो÷देखियो। एउटा राजनीतिक उद्देश्य सहितको सशस्त्र द्वन्द्वलाई अन्त्य गर्न गरिएको विशेष व्यवस्था र आपराधिक उद्देश्यले हतियार लुटिएका विषयको तुलना नै हास्यास्पद छ,’ उनले भनेका छन्।
त्यतिबेला तत्कालीन माओवादीका हतियार कन्टेनरमा दुइटा चाबीसहित सुरक्षित गरिएको र २८ वटा शिविरमा माओवादी लडाकुलाई सीमित गरेर अनमिनको निगरानीमा राखिएको तथ्य आयुक्तलाई थाहै हुनु पर्ने ज्ञवालीले सामाजिक सञ्जालमार्फत् बताएका छन्।
‘भलै संविधान सभाको पहिले निर्वाचनमा लडाकु र हतियार दुबैको दुरुपयोगका अनेकौँ घटना घटित भए,’ उनले भनेका छन्।
संवेदनशील जिम्मेवारीमा रहेका व्यक्तित्वबाट शान्ति सुरक्षाको यति संवेदनशील विषयमा यति गैरजिम्मेवार अभिव्यक्तिको अपेक्षा नरहेको ज्ञवालीको भनाइ छ।
-1746009348.jpg)
