पद चाहिँदैन, सक्रिय राजनीति गर्न दिनुस्, कुनै जेन–जी भन्दा कम छैनौँः प्रचण्ड

सेतोपाटी संवाददाता

काठमाडौं, मंसिर ११

नेपाली कम्युनिस्ट पार्टीका संयोजक पुष्पकमल दाहालले सक्रिय राजनीतिक गर्ने वातावरण बने पदमा रही रहनुपर्छ भन्ने मानसिकतामा आफूहरू नरहेको बताएका छन्।

बिहीबार काठमाडौंमा आयोजित एकता घोषणा सभालाई सम्बोधन गर्दै उनले यस्तो बताएका हुन्।

उनले उमेरको हिसाबले धेरैजसो नेताहरू उत्तरार्द्धमा रहेको बताए। तर राष्ट्रप्रतिको जिम्मेवारी, राष्ट्र जसरी भए पनि बचाउनुपर्छ, समाजवादको यात्रा जसरी पनि अगाडि बढाउनुपर्छ भन्ने कुरामा जेन–जी युवा भन्दा कम नरहेको बताए।

अन्तिम समयसम्म आफूहरू सक्रिय भूमिका निर्वाह गर्ने आकांक्षामा रहेको बताए।

जेन–जीलाई सही बाटोमा ल्याई समाजवादी क्रान्ति सम्पन्न गर्ने आफूहरूको चाहना रहेको बताए।

उनले भने, ‘हुनतः हामी उमेरको हिसाबले धेरैजसो नेताहरूले यहाँ अहिलेको उपस्थित छौँ। हामी उत्तरार्द्धतिर छौँ। तर राष्ट्रप्रतिको जिम्मेवारी, यो राष्ट्र जसरी भए पनि बचाउनुपर्छ, समाजवादको यात्रा जसरी पनि अगाडि बढाउनुपर्छ भन्ने कुरामा हामी कुनै जेन–जी युवा भन्दा कम पनि छैनौँ। अन्तिम समयसम्म हामी त्यो भूमिका पूरा गर्न चाहन्छौँ। जेन–जी युवाहरूको असली अभिभावक बन्न चाहन्छौँ। उनीहरूलाई सही बाटोमा ल्याउने र त्यो तागतलाई जोडेर समाजवादी क्रान्ति सम्पन्न गर्न चाहन्छौँ। यसो भन्दै गर्दा पदमा बसिराख्न खोजे भन्ने होलान्। हामी पद भइराख्नुपर्छ भन्ने छैन। हामीलाई सक्रिय राजनीतिक गर्ने वातावरण बन्यो भने पद हाम्रो लागि ठूलो कुरा होइन।’

संयोजक दाहालले आफूहरूको एकता एउटा आन्दोलन भएको बताए।