जापानका लागि राजदूतमा प्रस्तावित जिज्ञानकुमार थापाले नाम फिर्ता लिएको जानकारी संसदीय सुनुवाइ समितिलाई दिएका छन्।
सोमबार उनले संसदीय सुनुवाइ समितिलाई आफ्नो नाम फिर्ता लिएको जानकारी दिएका हुन्। उनले मौखिक रूपमा समितिलाई आफ्नो नाम फिर्ताको जानकारी गराएका थिए।
प्रस्तावित राजदूत थापाविरूद्ध जापानको स्थायी आवासीय अनुमति रहेको भन्दै उजुरी परेको थियो। उजुरीकर्ताले राजदूत पदका लागि जारी गरिएको पूर्वयोग्यतासम्बन्धी सूचनामा कुनै पनि विदेशी मुलुकको स्थायी वा अस्थायी आवासीय अनुमति प्राप्त गरेको व्यक्ति अयोग्य हुने स्पष्ट व्यवस्था रहेको उल्लेख गरेका थिए।
थापाले सन् २०१८ मा जापानको एक पत्रिकालाई दिएको अन्तर्वार्तामा आफूसँग पीआर रहेको र त्यसपछि जापानमा बस्दै आएको बताएका थिए। उजुरीमा जापानको कानागावा प्रिफेक्चरमा उनको घरसमेत रहेको उल्लेख गरिएको थियो।
साथै उनले संसदीय सुनुवाइ समितिमा आफूले जापानको स्थायी आवासीय अनुमति (पीआर) त्यागेको प्रमाण पेससमेत गरेका थिए। उनले सन् २०२६ को मार्च २५ मा पीआर त्यागेको प्रमाण पेस गरेका थिए।
‘पीआर त्यागेको छु। टोकियोस्थित दूतावासमा पुगेर परराष्ट्र मन्त्रालयलाई लिखित जानकारी पठाएको सुनेको छु। पीआर छ भन्ने आधारमा यो सबै विषय उठेको हो। मैले पिआर त्यागिसकेको छु। म सन् २००० मा जापान गएको हुँ। जापान जानुअघि शतवार्षिकी वर्षमा जनस्तरको सम्बन्धका विषयमा अनुवादकका रूपमा काम गरेको थिएँ। म कूटनीतिज्ञ बन्नकै लागि अन्तर्राष्ट्रिय कानुन (इन्टरनेसनल ल) पढेको हुँ,’ सांसदहरूले प्रश्न उठाएपछि जबाफमा थापाले भनेका थिए।
उनका विषयमा संसदीय सुनुवाइ समितिले सिफारिस होल्ड गरेको थियो।
