रक्षा मन्त्रालयको पनि जिम्मेवारी सम्हाल्दै आएकी प्रधानमन्त्री सुशीला कार्कीले नेपाली सेनाको मुख्यालय जंगी अड्डाको निरीक्षण गरेकी छन्।
कार्कीले शुक्रबार मुख्यालयको निरीक्षण गरी निर्वाचन सुरक्षा तयारीबारे जानकारी लिएकी हुन्। उनले पछिल्लो सुरक्षा अवस्था, प्रमुख चुनौती र आगामी योजनाबारे ब्रिफिङ लिएको प्रधानमन्त्रीको सचिवालयले जनाएको छ।
फागुन २१ गते हुने निर्वाचनको सुरक्षाका लागि सेना परिचालनको योजना र ढाँचाबारे जानकारी लिएकी थिइन्। प्रधानमन्त्री कार्कीले भ्रमणको क्रममा तीन बुँदे निर्देशन समेत दिएकी छिन्।
‘जनतालाई सुरक्षाको प्रत्याभूति दिन, प्रहरी कारबाहीलाई सहजीकरण, सहयोग र सुरक्षित गर्न तथा सबै राजनीतिक दलका राजनीतिक गतिविधिहरूलाई बिना अवरोध सञ्चालन गर्ने वातावरण सिर्जना गर्न स्पष्ट कार्ययोजनासहित अघि बढ्न म निर्देशन दिन्छु,’ उनले भनिन्।
त्यस्तै निर्वाचनमा कुनै पनि मानवीय क्षति नहुनेगरी काम गर्न पनि निर्देशन दिएकी थिइन्।
‘मैले यसअघि पनि भन्दै आएको छु कि आगामी चुनावमा एक थोपा पनि रगत बग्नु हुँदैन र एक जना पनि घाइते हुनुहुँदैन। यसअघिका चुनावको समेत अनुभव र आसन्न चुनावका विविध आयामबाट विश्लेषण गरी सुरक्षा संवेदनशीलताका आधारमा सबै सुरक्षा निकायहरुसँगको समन्वयात्मक र त्रुटिरहित ढंगले काम गर्न म निर्देशन दिन्छु,’ उनले भनिन्।
त्यस्तै जेनजी आन्दोलनको क्रममा लुटिएका हतियार फिर्ता गराउनमा सेनाले प्रहरीलाई समेत सघाउनुपर्ने उनले बताइन्।
‘जेनजी आन्दोलनको क्रममा लुटिएका र हराएका हातहतियारको खोजी तया नियन्त्रणमा लिन प्रहरीलगायत सुरक्षा निकायसँग सहकार्य गरी स्थिति सामान्य पार्ने र फरार अपराधी पक्रन प्रहरीलाई सहयोग गर्न पनि कुनै कसर बाँकी नराखी खट्नुहोस्,’ उनले भनिन्।
-1756446574.jpg)
-1746009348.jpg)
