नेपाली कांग्रेसका सभापति शेरबहादुर देउवानिकट केन्द्रीय सदस्यहरूले आज पनि काठमाडौंमा छुट्टाछुट्टै भेला गरेका छन्।
फागुन २१ गतेको प्रतिनिधि सभा निर्वाचनअघि पार्टीको महाधिवेशन गर्न सकिने र नसकिने पक्षले बेग्लाबेग्लै ठाउँमा भेला गरेका हुन्।
केही पूर्वपदाधिकारीसहित करिब ९० जना केन्द्रीय सदस्यहरूले बानेश्वरमा भेला गरेका हुन् भने २८ जना केन्द्रीय सदस्यले ललितपुरको कुपण्डोलमा भेला गरेका हुन्।
बानेश्वरको भेलामा पूर्वउपसभापति विमलेन्द्र निधि, विजयकुमार गच्छदार, पूर्वमहामन्त्रीद्वय प्रकाशमान सिंह र कृष्णप्रसाद सिटौलासहित केन्द्रीय सदस्य पनि थिए। सभापति देउवाले छलफलका लागि निवासमा बोलाएपछि निधि, सिटौलालगायत नेताहरू भेलाकै बीचबाट गएका थिए।
यो भेलाले अहिले निर्वाचनमा होमिनुपर्ने र महाधिवेशन वैशाखमा मात्र गर्न उपयुक्त हुने निष्कर्ष निकालेको नेताहरूले बताएका छन्। ‘निर्वाचन तयारीका लागि हामीसँग अब समय कम छ, उम्मेदवारहरू सिफारिस माग्न थाल्नुपर्छ, अहिले महाधिवेशन गरे पार्टीभित्र विवाद देखिन्छ र त्यसले निर्वाचनमा असर पार्छ भन्ने हाम्रो निष्कर्ष हो,’ भेलामा सहभागी एक केन्द्रीय सदस्यले भने।
साथै कुपन्डोलमा भएको भेलाले चुनावअघि महाधिवेशन गर्नुपर्ने निष्कर्ष निकालेको छ।
सभापति देउवा पक्षका केन्द्रीय सदस्यहरू राजेन्द्र केसी, भरतकुमार शाह, अर्जुनप्रसाद जोशी, पुष्पा भुसाल, कर्णबहादुर बुढा, गणेश लामा, आङगेलु शेर्पा, डिला संग्रौला, उदयशम्शेर राणा, नानु बास्तोला, धना खतिवडा, अब्दुल रज्जाक, देवेन्द्रराज कँडेल, योगेन्द्र चौधरी, गोपाल दहित, बहादुर सिंह लामा, दिलमान पाख्रिन, अब्दुल सत्तार, मोहन आचार्य, अमृत अर्याल, जिपछिरिङ लामा, रामजनम चौधरी, चम्पादेवी खड्का, नारायणबहादुर कार्की, चीनकाजी श्रेष्ठ, तारामान गुरूङ, उमा रेग्गी चुनावअघि महाधिवेशनका पक्षमा छन्।
केन्द्रीय सदस्य आङगेलु शेर्पाले अनिर्णयको बन्दी नबन्न र तत्काल महाधिवेशन मिति तोक्न नेतृत्वलाई आग्रह गर्ने निर्णय भएको जानकारी दिए।
‘तत्काल नियमित महाधिवेशन गर्न नेतृत्वलाई आग्रहसहित दबाब दिने निर्णय भयो,’ उनले भने। शुक्रबार बिहान ११ बजेदेखि १ बजेसम्म छलफल चलेको थियो।
यसैबीच सभापति शेरबहादुर देउवाले पनि महाधिवेशनबारे विवाद मिलाउन छलफल गरेका छन्। निवासमा कार्यवाहक सभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्मा, पूर्वउपसभापति विमलेन्द्र निधि, पूर्वमहामन्त्री कृष्णप्रसाद सिटौलासहित नेताहरूबीच छलफल भएको छ।
पुसभित्रै नियमित महाधिवेशन गर्ने गरी आन्तरिक छलफल अघि बढेको नेताहरूले जनाएका छन्। आइतबारका लागि केन्द्रीय समिति बैठक बोलाएकोले त्यसअघि नै महाधिवेशनबारे निर्णयमा नेताहरू पुग्ने बताइएको छ।
५४ प्रतिशत महाधिवेशन प्रतिनिधिहरूले पुस २८ गतेभित्र विशेष महाधिवेशन गर्न माग गरिरहेका छन्।
-1756446574.jpg)
-1746009348.jpg)
