नेपाली कम्युनिष्ट पार्टी (नेकपा)ले पोखराको चिप्लेढुंगामा सभा राखेपछि स्थानीय व्यवसायीले विरोध प्रदर्शन गरेका छन्।
राजनीतिक दल तथा विभिन्न समूहले नारा, जुलुससहित उक्त स्थानमा सभा राख्दा व्यवसाय चौपट भएको भन्दै स्थानीय व्यवसायीले विरोध गरेका हुन्। उनीहरूले ‘गरिखान देउ’ भन्दै प्लेकार्ड बोकेर प्रदर्शन गरेका थिए।
नेकपाका कार्यकर्ताले प्रदर्शनकारी स्थानीय व्यवसायीमाथि आक्रमणको प्रयाससमेत गरेको व्यवसायीहरूले बताएका छन्। सडक छेकेर सभा गर्दा यात्रु तथा ग्राहकहरू आउजाउ गर्न नपाएको र व्यवसाय बन्द गरेर बस्नुपर्ने अवस्था आएकाले विरोध प्रदर्शन गरेको चिप्लेढुंगा सिद्धार्थचोक व्यवसायी समितिका अध्यक्ष दुर्गा सुनारले बताए।
‘हामीले बारम्बार चिप्लेढुंगा मानवअधिकार चोकमा सभा सम्मेलन नगर्न ध्यानाकर्षण गराइरहेका छौं, सुनुवाई नभएपछि आज प्रदर्शनमा उत्रनुपर्यो,’ उनले भने, ‘सडक रोकेर सभा गर्न भन्दा सभाहल वा अन्यत्र मैदानतर्फ गर्नुपर्छ। यहाँ सभा गर्दा हाम्रो व्यवसाय चौपट भयो।’
स्थानीय व्यवसायीको विरोधका बाबजुद नेकपाले उक्त स्थानमा सभा गरिरहेको छ। सभामा नेकपा संयोजक पुष्पकमल दाहाल प्रचण्ड, सहसंयोजक माधव नेपाल, पूर्वप्रधानमन्त्री झलनाथ खनाल लगायत नेताहरू सहभागी छन्।
सभालाई सम्बोधन गर्दै पोखरा महानगरका मेयर धनराज आचार्यले व्यवसायीले उठाएका विषयप्रति आफू गम्भीर रहेको बताए। देशका ३ जना पूर्वप्रधानमन्त्री सहभागी हुने कार्यक्रम भएकाले उक्त स्थानमा सभा गर्न अनुमति दिएको उनले बताए।
‘देशका ३/३ जना पूर्वप्रधानमन्त्री आउनुभएकाले उहाँहरूको सम्मानका लागि पनि आज यहाँ कार्यक्रम गर्न अनुमति दिएका हौं,’ मेयर आचार्यले भने, ‘आगामी दिनमा बिदाको दिनबाहेक यहाँ कार्यक्रम गर्न अनुमति दिँदैनौं।’
सडकमा बाटो छेकेर सभा गर्न रोक लगाउन माग गर्दै व्यवसायीले आइतबार जिल्ला प्रशासन कार्यालय पुगेर ज्ञापन पत्र बुझाएको छ। सिडिओ रूद्रादेवी शर्मालाई बुझाइएको ज्ञापन पत्रमा मुलुकी अपराध संहितामा सार्वजनिक सडक रोक्न नपाउने व्यवस्था गरेको भन्दै सोही कानुन अनुसार मानवअधिकार चोकमा सभा सम्मेलन गर्न रोक लगाउन माग गरेका छन्।
-1746009348.jpg)
