राष्ट्रिय सभा अध्यक्ष नारायणप्रसाद दाहालले नेपालमा विश्वस्तरीय औषधि उद्योग स्थापना गर्न स्विट्जरल्याण्डसँग सहकार्यको प्रस्ताव राखेका छन्।
स्विट्जरल्याण्डको नेशनल काउन्सिलका अध्यक्ष पिएरे आन्द्रे पाजसँग सोमबार भएको शिष्टाचार भेटका क्रममा अध्यक्ष दाहालले नेपालमा औषधि उद्योग स्थापना गर्न सरकारी तहबाट पहल गर्न आग्रह गरे।
भेटपछि सञ्चारकर्मीसँग कुरा गर्दै अध्यक्ष दाहालले स्विट्जरल्याण्डमा विश्वस्तरीय औषधि उद्योग तथा कम्पनीहरू रहेकाले नेपालमा पनि त्यस्ता उद्योग स्थापना गर्न सहकार्यको प्रस्ताव राखेको बताए।
उनले नेपालमा औषधि उद्योग सञ्चालन गर्न सकेमा नेपाली जनताले सहुलियतमा औषधि प्राप्त गर्न सक्ने उनको भनाइ छ।
उनका अनुसार स्विट्जरल्याण्डका अध्यक्ष पाजले नेपाललाई आवश्यक पर्ने औषधि तथा अन्य सहयोगका विषयमा जानकारी गराउन आग्रह गर्दै त्यसका लागि पहल गर्ने प्रतिबद्धता जनाए।
अध्यक्ष दाहालले नेपाललाई विकास साझेदारका रूपमा स्विट्जरल्याण्डले सहयोग गर्दै आएको र आगामी दिनमा पनि सहयोग गर्ने अपेक्षा राखेको बताए।
उनले विपद्का समयमा स्विट्जरल्याण्डले गर्दै आएको सहयोगको प्रशंसा गर्दै आगामी दिनमा पनि सहयोग निरन्तर रहने विश्वास व्यक्त गरे।
हालै भोटेकोशी बाढीबाट प्रभावितका लागि स्विट्जरल्याण्डले २ मिलियन अमेरिकी डलर सहयोग गरेको थियो।
उनले भने, ‘हालै भोटेकोशीमा आएको बाढीबाट प्रभावित नागरिकका लागि स्विट्जरल्यान्डले २ मिलियन अमेरिकी डलर सहयोग गरेकोमा पनि धन्यवाद व्यक्त गरेँ। यसैगरी, नेपाल र स्विट्जरल्याण्डबीच कूटनीतिक सम्बन्ध स्थापना भएको ७० औँ वर्षगाँठका अवसरमा शुभकामना आदानप्रदान गरियो। स्विट्जरल्याण्डमा राम्रा–राम्रा औषधि उद्योगहरू छन्, कम्पनीहरू छन्, ठूला–ठूला विश्व स्ट्याण्डर्डका। त्यो यदि सम्भव हुन्छ भने सरकारीस्तरबाटै नेपालमा पनि औषधि उद्योग स्थापना गर्न सहयोग भएमा नेपाली जनतालाई अलि सहुलियत हुने थियो भनेर मैले प्रस्ताव गरेको थिएँ।’
उनले अगाडि भने, ‘उहाँले सिधै के प्रस्ताव राखिदिनुभयो भने तपाईंहरूलाई के–के हो, तपाईंहरूको आवश्यक्ता भन्नुुस्, हामी त्यसको लागि पहल गर्छौँ भन्ने खालको उहाँले राख्नुभयो। उहाँले नेपालका आवश्यकता पहिचान गरी त्यसका लागि आवश्यक पहल गर्ने प्रतिबद्धता समेत व्यक्त गर्नुभयो। मैले सम्बन्धित निकायसँग यस विषयलाई गम्भीरतापूर्वक राख्ने प्रतिबद्धता व्यक्त गरेँ। त्यसैगरी, दुई देशबीच संसदीयमैत्री समूह गठन गर्ने विषयमा पनि छलफल भयो। उहाँले स्विट्जरल्यान्डमा पनि संसदीय मैत्री समूह गठन गर्छौं भन्नुभयो, यहाँबाट जाने बित्तिकै हामी बनाउँछौँ भन्नुभएको छ। यो संसदीय समूहमार्फत दुई देशको संसदीय अभ्यासलाई आदानप्रदान गर्ने र सहयोग गर्ने सहमति भएको छ।’
नेपाल र स्विट्जरल्याण्डबीच कुटनीतिक सम्बन्ध स्थापना भएको ७० औँ वर्षगाँठका अवसरमा दुवै पक्षले शुभकामना आदानप्रदान गरेका थिए । भेटमा दुई देशबीच संसदीय सहकार्य विस्तार गर्ने विषयमा समेत छलफल भएको अध्यक्ष दाहालले जानकारी दिए।
साथै संसदीय मैत्री समूह गठन गरी संसदीय अभ्यास, अनुभव र ज्ञान आदानप्रदानलाई अघि बढाउने सहमति भएको पनि उनले बताए।
अध्यक्ष दाहालले नेपालको शान्ति प्रक्रियालाई निष्कर्षमा पुर्याउन तथा संघीय लोकतान्त्रिक गणतन्त्रलाई संस्थागत गर्न स्विट्जरल्याण्डले पुर्याएको सहयोगको स्मरण गर्दै आगामी दिनमा पनि सहकार्य आवश्यक रहेको उल्लेख गरे।
भेटमा अध्यक्ष पाजले दाहालले उठाएका विषयहरू चासोपूर्वक सुनेको र सहयोगका प्रस्तावप्रति सकारात्मक प्रतिक्रिया दिएको अध्यक्ष दाहालले जानकारी दिए। –न्युज एजेन्सी नेपाल
