नेकपा एमालेले ११ औं महाधिवेशनमा भाग लिने प्रतिनिधिको नाम घोषणा गरेको छ।
कास्कीमा रहेका ३ वटा प्रतिनिधि सभा निर्वाचन क्षेत्र र एउटा गैरभौगोलिक उत्पीडित क्षेत्रबाट प्रतिनिधिको नाम घोषणा गरेको एमाले कास्कीका अध्यक्ष बैनबहादुर अधिकारी क्षेत्रीले बताए।
कास्कीबाट एमालेको महाधिवेशनमा २३ जना प्रतिनिधि सहभागी हुन पाउँछन्। जसमा १२२ जनाले महाधिवेशन प्रतिनिधिका लागि मनोनयन दर्ता गरेका थिए। शनिबार महाधिवेशन प्रतिनिधिको निर्वाचन गर्ने कार्यतालिका रहे पनि नेताहरू बसेर सहमतिमा प्रतिनिधिको घोषणा गरेको अध्यक्ष क्षेत्रीले बताए।
‘सबैजसो महाधिवेशन प्रतिनिधिको आकांक्षी र नेताहरू मिलेर सहमतिमा प्रतिनिधिको नाम छनौट गरिएको छ,’ उनले भने, ‘एकाथ साथीहरूले चित्त दुखाउनुभएको छ, त्यो स्वभाविक नै हो।’
उनका अनुसार कास्की-१ बाट खुलामा अध्यक्ष क्षेत्री, प्रदेश सांसद बेदबहादुर गुरूङ, टिकाराम पंगेनी र दर्शन लामा छनौट भएका छन्। महिलामा विजया सुवेदी र नारायणी भट्टराई ‘रक्षा’ र युवामा नवराज ओझा छनौट भएका छन्।
कास्की-२ बाट खुलामा रामप्रसाद खनाल, रश्मी आचार्य, भेषराज बराल र तेजनारायण अधिकारी, महिलामा सिर्जना शर्मा र हिरा गिरी र युवातर्फ विजय पौडेल छनौट भएका छन्।
कास्की-३ मा खुलातर्फ लालबहादुर परियार, दीपक पौडेल, जगन्नाथ बास्तोला र माधव बास्तोला छनौट भएका छन्। महिलातर्फ गिता विक र शोभा पहारी बराल र युवातर्फ भरतमान गुरूङ छनौट गरेको अध्यक्ष क्षेत्रीले बताए।
यस्तै, उत्पीडित क्षेत्रबाट प्रेम विक र दामबहादुर विक छनौट भएका छन्।
गण्डकी प्रदेशबाट उम्मेदवार हुन चाहेका नेताहरू उपमहासचिव पृथ्वीसुब्बा गुरूङ, सचिव पद्मा अर्याल, स्थायी कमिटी सदस्य खगराज अधिकारी र किरण गुरूङलाई एकमतका साथ समर्थन जनाउने पनि सहमति भएको उनले बताए।
प्रतिनिधि छनौटमा नपरेपछि गण्डकी प्रदेश सांसद गणेशमान गुरूङ, देवी सुवेदी, देवका पहारी, धनबहादुर नेपाली लगायत नेता तथा कार्यकर्ताले भने असन्तुष्टि जनाएका छन्। उनीहरूले प्रतिनिधि छनौटमा नेताहरूले मनोमानी गरेको आरोपसमेत लगाएका छन्।
-1764492696.jpg)
-1746009348.jpg)
